Opozita e Bashkuar kërkoi mbledhje të Këshillit Politik, Gjiknuri: KQZ nuk diskutohet më, qartësoni pikat tjera!

Përfaqësuesi i mazhorancës në Këshillin Politik dhe bashkëkryetari i Komisionit të Posaçëm Parlamentar për Reformën Zgjedhore, Damian Gjiknuri i është përgjigjur Opozitës së Bashkuar për formulën e re të KQZ dhe kërkesën për mbledhjen e radhës të Këshillit Politik duke e bërë të qartë propozimi nuk mund të diskutohet sepse është jashtë Marrëveshjes për Reformën Zgjedhore.

Propozimi për formulën e KQZ, tha Damian Gjiknuri duhet të jetë i ri dhe të respektojë faktin që Parlamenti është sovran në zgjedhjen e KQZ. Ndërsa për kërkesën për mbledhje të Këshillit Politik në orën 17:00, Gjiknuri i ka kërkuar opozitës që të qartësojë pikat tjera alternative që mund të zgjidhen dhe të mos humbin kohë me debate të kota.

Deri më tani Damian Gjiknuri nuk ka konfirmuar pjesëmarrjen në mbledhjen e Këshillit Politik sot me ftesë të opozitës.

Ndryshe, Opozita e Bashkuar sot ka kërkuar mbledhjen e Këshillit Politik në orën 17:00 pas propozimit që hodhi në tryezë për një formulë të re të përzgjedhjes së anëtarëve të KQZ.

Përfaqësuesi i Opozitës së Bashkuar në Këshillin Politik, Oerd Bylykbashi sqaroi se anëtarët e tre trupave të KQZ të emërohen si në rastin e organeve të drejtësisë. Por Përfaqësuesi i mazhorancës në Këshillin Politik, Damian Gjiknuri, nga ana tjetër tha se PD-LSI kërkojnë të kthehen tek KQZ-ja aktuale. Ky kundërshtim, sipas Opozitës së Bashkuar bëhet për të kapur të tre organet e KQZ.