“Opozita flet ditën për oligarkët dhe flirton natën”, Për Nikun e Ndraghetas, Rama: S’jam kryeministër që përgojoj dynjanë!
Nga Konferenca e përjavshme “Ekonomia në fokus”, Kryeministri Edi Rama la vetëm fokusin duke e shndërruar në “Opozita në fokus”. Çdo detaj ekonomik u shoqërua me opozitën madje edhe kur foli për taksën progresive me të cilën dështoi, sërish iu kthye taksës së sheshtë që është pjesë e programit të opozitës për zgjedhjet e 25 prillit, duke u munduar ta bindë miletin se godet 97% të popullsisë; Madje sipas Kryeministrit, opozita flet për oligarkët ditën dhe flirton me ta natën.
A është ky përgojim, në vendin e shqiponjave këtë e vendos Kryeministri Edi Rama, ashtu siç vendosi të mos përgjigjet se pse Niku që dilte në përgjimet e Ndranghetas, ka marrë tre tendera të tjerë, pa pritur që SPAK të mbyllë hetimet. Arsyetimi ishte i paparë, sa që as Konica i tij i dashur nuk do ta thurte me kaq mjeshtri: Nuk është puna e një Kryeministri që të përgojojë dynjanë!
“Dua të ndal tek raporti i kësaj qeverie me të pasurit. Ja ku e keni listën e të pasurve, të mëdhenjtë, të oligarkëve, në buxhetin e shtetit, ja dhe kontributin në 2019. S’kemi marrë 2020-ën se ishte vit me anomal për të gjithë. Ja sa para më shumë ka marrë shteti nga xhepi i më të pasurve. 142% më shumë. Tani merreni atë kolonën e fundit dhe merrni një sharë dhe sharroheni me taksën e sheshtë 9%. Pala tjetër dëshiron që t’ua lërë në xhep oligarkëve. Flet ditën dhe flirton natën. Grafiku i tretë që dua të sjell në vëmendjen tuaj është tatimi progresiv mbi pagën e individëve. Shikojeni se si është ulur tatimi dhe se si janë rritur të ardhurat nga paga e tatim-fitimit mbi të ardhurat e individëve.
Ka pasur një rënie në momentin e parë, dhe më pas ka ardhur në gjithnjë. Meqë predikohet se me taksën e sheshtë mblidhen më shumë lekë. Me taksën e sheshtë goditen ata që fitojnë më pak. Mbështet pronarët tuaj individualisht dhe ju që jeni këtu në ekran, do paguani më shumë nga rroga juaj. Taksa e sheshtë është për të pasurit, taksimi i ndershëm është për shumicën dërrmuese. Taksa e sheshtë është për ata që fitojnë më shumë në mbështetje të tyre dhe goditje për ata që fitojnë më pak. Ata që fitojnë më pak janë 97%,” tha Edi Rama ndërkohë kur u pyet për Nikun e përgjimeve të Ndranghetas, Besnik Halilin, i cili së fundi ka marrë tre tendera të tjerë me 10 mln euro, përgjigjen e cilësoi “përgojim të dynjasë”:
“Ka ligje dhe etikë në këto punë. Të gjitha këto që thoni janë të papërputhura me realitetin. Nuk e kam për zakon të flas për emra kompanish e biznesesh, se nuk është puna e një kryeministri që të përgojojë dynjanë, sic e ka bërë paraardhësi im. Është gjë shumë e mirë që SPAK është përfshirë në këtë cështje për t’i dhënë një përgjigje atyre që, sipas meje, cfarë janë thënë, janë dokrra. Nëse ka gjëra që s’janë thënë, me siguri SPAK do t’i gjejë. Por deri më tani dokrra, dokrra, dokrra, shumë e thjeshtë, asgjë me sens.”
