Opozita fton Kryeministrin Kurti të raportojë në Parlament për dialogun

Kryesia e Parlamentit të Kosovës ka vendosur të ftojë Kryeministrin Albin Kurti për raportim në Parlament, lidhur me takimet e fundit që u zhvilluan në Bruskel.

Këtë e ka bër të ditur Kryetari i Grupit Parlamentar të LDK-së Arben Gashi, me përfundimin e mbledhjes:

 “Cili është drafti që është pranuar dhe si kemi ardhur deri te ky proces dhe ky konkluzion, presim që Kryeministri të jetë në Kuvend së bashku me dokumentet të cilat i ka pranuar dhe këto të diskutohen në Kuvend,” tha Arben Gashi duke shtuar se u shpreh dhe shqetësimi për grevën e minatorëve të Trepçës, ku dhe u kërkua që sa më shpejtë Kryeministri dhe Qeveria të gjejnë një zgjidhje për situatën e krijuar ndërsa përfundoi:

“Kërkesat e minatorëve janë minimaliste dhe duhet dhe të gjitha duhen të plotësohen”, tha ai.

Ndërsa Kryetari i Grupit Parlamentar të PDK-së, Abelard Tahiri tha se raportimi i Kryeministrit mbi dokumentin me të cilin është pajtuar në Bruksel, është obligim që duhet ta respektoj.

“Mendoj që ky është një obligim i Kryeministrit dhe është obligim i Rezolutës që është miratuar në Kuvend. E rëndësishme është që të kuptohet se në çfarë është pajtuar Qeveria e Kosovës dhe si do të jetë që kryeministri është pajtuar për Asociacionin,” tha Abelard Tahiri ndërsa për grevën e minatorëve të Trepçës tha se do të kërkohet në seancën e radhës që përmes një rezolute të pranohen kërkesat e minatorëve.