Opozita në Serbi kërkon anulimin e rezultatit në Beograd, thirrje për protestë në orën 18:00
Lista opozitare “Serbia kundër dhunës” kërkon anulimin e zgjedhjeve në Beograd duke dhënë dhe fakte ndërsa ka bërë thirrje për protestë në orën 18:00 para Bashkisë Beograd.
Bartësi i listës së këtij koalicioni opozitar Marinika Tepiç tha se këto zgjedhje duhet të anulohen sepse janë vjedhur. Duke bërë thirrje për protesta në orën 18:00 para Bashkisë Beograd, ajo tha se atje do të shpalos dhe kërkesat e saj.
Ndërsa numri dy i kësaj liste opozitare, Miroslav Aleksiç, tha se deri në këtë moment, shtabi zgjedhor i listës “Serbia kundër dhunës” ka numëruar 80 për qind të votave në Beograd dhe SNS e Vuçiçit ka vetëm 21 mijë vota më shumë se koalicioni opozitar ndërsa renditi disa parregullsi të zgjedhjeve të 17 dhjetorit.
“Dokumentuam se si janë blerë votuesit dhe presioni ndaj tyre, por ajo që është më e rëndësishme është votimi i votuesve fantazmë. Sipas vlerësimit tonë janë rreth 40 mijë njerëz që nuk jetojnë në Beograd dhe kanë votuar në Beograd, dhe kjo ka ndikuar direkt në rezultatin zgjedhor,” tha Miroslav Aleksiç nga lista e koalicionit opozitar “Serbia kundër dhunës”.
Ndryshe, derisa opozita serbe ka paralajmëruar protesta në orën 18:00 në Beograd, Kryetari i Komisionit Qendror të Zgjedhjeve të Serbisë, Vladimir Dimitrijeviç, tha se sot deri në orën 20:00 do të shpallen dhe rezultatet paraprake të zgjedhjeve parlamentare të 17 Dhjetorit.
