Opozita serbe nuk merr pjesë në përsëritjen e pjesshme, kërkon anulimin e zgjedhjeve

Lista “Serbia kundër dhunës”, SPN, ka bërë të ditur sot se nuk do të marrë pjesë në përsëritjen e zgjedhjeve në qendrat e caktuara të votimit më 30 dhjetor, sepse përsëritja në ato qendra nuk do të anuloj vjedhjen dhe as nuk do të korrigjoj padrejtësinë e 17 dhjetorit.

“E kemi bërë të qartë se kërkojmë anulimin e të gjitha zgjedhjeve që u mbajtën më 17 dhjetor në përputhje me raportet e organizatave vendore dhe ndërkombëtare që kanë vëzhguar procesin zgjedhor. Për këtë arsye komisioneret e koalicionit ‘Serbia kundër dhunës’ nuk do të marrë pjesë në vazhdimin e vjedhjes zgjedhore të Vuçiçit,“ thekson kjo Listë përmes një njoftimi tashmë kur KQZ ka marrë vendimin që zgjedhjet të përsëriten në 28 qendra të votimit.

Në kohën kur në Serbi deputetët janë në grevë urie sepse janë dëshmuar manipulimet zgjedhore, arrestohen ata që mendojnë ndryshe politikisht, keqtrajtohen dhe arrestohen studentët, institucionet mbrojnë regjimin dhe jo ligjin, rrugaçët sulmojnë qytetarët që protestojnë dhe gazetarët që raportojnë, si dhe pronën që është e të gjithëve, Lista “Serbia kundër dhunës” thotë se votimi në këto kushte nuk ka kuptim.

Ndryshe, koalicioni i nëntë partive “Serbia kundër dhunës” së bashku me grupet joformale të studenatëve (Studentët kundër dhunës, Lufta) dhe grupit joformal të personaliteteve publike (Shpallje), nga 18 dhjetori bëjnë thirrje për protestë për shkak të vjedhjes zgjedhore në Bashkinë Beograd dhe nivelet tjera.

Pas presionit të lartë ndaj hajdutit të zgjedhjeve, Presidentit Aleksandar Vuçiç, Komisioni Qendror i Zgjedhjeve ka vendosur më 20 Dhjetor që për shkak të parregullsive të caktuara, zgjedhjet parlamentare të përsëriten më 30 dhjetor në 28 qendra të votimit në komunat: Babushnicë, Gradishtë e Madhe, Vlasotincë, Trstenik, Zhagubic, Kocelev, Leban e Plandisht, ku pritet të votojnë 12.240 qytetarë.

Pragun prej 3 për qind shpreson ta kaloj koalicioni Dveri dhe Zavetnici që në 17 Dhjetor arritën të marrin 2.8 për qind, ndërsa koalicioni SPN u rendit e dyta me 23.65 për qind nga 900 mijë votat e vlefshme, që është dhe rezultati më i mirë i një koalicioni opozitar në 11 vitet e pushtetit të Presidentit të Serbisë, Aleksandar Vuçiç, me partinë e tij SNS.