Opozita: Të shtyhet afati i kartave të identitetit; Rama: Propozim i mirëseardhur!

Kryeministri Edi Rama e ka mirëpritur kërkesën e Opozitës së Bashkuar për zgjedhjet e 25 prillit që të shtyhet afati për kartat e identitetit që kanë skaduar ndërkohë koalicionin e Opozitës së Bashkuar e konsideron hibrid të pangrënshëm, të pagëlltitshëm dhe të patretshëm.

“Nuk e kam dëgjuar këtë si propozim. Zgjedhjet janë të përbashkëta. Rregullat e lojës janë aprovuar bashkarish. Çdo propozim i arsyeshëm që bën secila parti, dhe që është në interes të procesit zgjedhor, është i mirëseardhur.

Bën sens dhe do të trajtohet me të gjithë seriozitetin e duhur në mënyrë që të gjitha palët në këtë proces të ndihen të barabarta në rregullat e lojës,” tha Kryeministri Rama pas mbledhjes së shtabit elektoral të Partisë Socialiste ndërsa për koalicionet parazgjedhore gjeti rastin të sulmoj opozitën sepse PS-në edhe me këtë rast e bëri të qartë që e ka koalicionin me njerëzit:

“Sistemi që kemi zgjedhur është një sistem ku cdo parti garon me simbolin e saj dhe me skuadrën e saj, ose bën një koalicion me një simbol dhe në një skuadër të përbashkët. Ne e kemi pasur të qartë, që ne koalicionin e kemi me njerëzit dhe shumicën e kemi me njerëzit. Kështu që nuk kemi asnjë diskutim në këtë pikë. Sigurisht e mirëkuptoj pyetjen, duke parë se çfarë ndodh në kampin tjetër, ku po punohet për një hibrid të pangrënshëm, të pagëlltitshëm dhe të patretshëm.”