Opozitar, në kohën e kolerës!
nga Agim Popoci
Gabriel José de la Concordia García Márquez arriti para 40 viteve ta imagjinoj një shprehje dashurie për herë të dytë pas 50 viteve 9 muajve e katër ditëve, vetëm si “El amor en los tiempos del cólera”, por, nuk dihet nëse do t’ia arrinte, përkundër talentit që kishte në letërsi dhe besimin në socializëm, ta hidhte në letër dashurinë e një demokrati me një pushtues komunist që sot thotë se është socialist, vetëm pse i serviret si opozitar!
Opozitar, pas 81 viteve 1 muaji dhe 9 ditëve, kur partia e tij e zemrës u fut si triumfatore për të pushtuar kryeqytetin shqiptar në emër të “çlirimit”, për tu bërë kandidat për Kryetar të Bashkisë Tiranë, si opozitar në kohën e kolerës “Edi Rama”!
Dhe jo vetem kaq!
Përveç dashurisë dhe kandidimit të këtij lloj opozitari, demokratëve, 35 vjet 2 muaj dhe 6 ditë pas krijimit të partisë së idealeve të tyre, PD, u thuhet që në garën për të parin e kryeqytetit, duhet ta mbështesin këtë ithtar të pushtuesit komunist të Tiranës, që pandehur na del si një opozitar në kohën e kësaj kolere që ka kapluar tokën shqiptare!
Demokratët ishin protagonistë nga dita e parë e themelimit të partisë së tyre që dëgjojnë nga altoparlantët e Sigurimit të Shtetit se PD nuk ka njerëz të aftë për Kryetar të Bashkisë Tiranë, Ministër dhe Kryeministër, por kurrë nuk reshtën së luftuari këtë kolerë e cila nuk rezultoi vetëm sëmundje e zonave të varfra, e cila infekton njerëzit që nuk kanë mjaftueshëm ujë të pastër dhe sistem të kanalizimeve, por e gjithçkaje që arrin të prek.
Pas 20 vjetëve të propagandës komuniste, ku të gjitha mediat kombëtare nuk pushuan së degraduari qeverinë demokratike 8 vjeçare me sloganin “Fajet i ka Saliu”, dhe asgjë nuk ndryshoi me riardhjen në pushtet të komunistëve në vitin 2013, kur Saliu vazhdoi ti ketë fajet edhe në opozitë, shfaqet Kryeministri i Qeverisë më të korruptuar në historinë e shtetit shqiptar, Edi Rama, si dirigjent i kësaj propagande absurde duke dorëzuar partitura të reja për të ardhmen e opozitës, me vlerësimin se PD nuk ka njerëz që dinë të qeverisin!
Dhe, më 6 Tetor 2025, në selinë e PD flamuri ishte në gjysmështizë, kandidati i opozitës për Kryetarin e Bashkisë Tiranë nuk është demokrat, por, i pavaruri nga Sali Berisha, Florjan Binaj!
Dikush edhe mund ta ketë menduar se nuk ka demokratë që do të pyes pse protestoi para Bashkisë Tiranë, pse kërkoi dorëheqjen e Kryetarit Erion Veliaj, kur Partia Demokratike si organizatore e kësaj partie nuk paska pas një kandidat për Kryetar të ri të Bashkisë Tiranë dhe sot duhet t’i përulet dhe mbështesë kërkesën, që të kandidoj me një person që vetëm demokrat nuk duhet të jetë; Dhe, sot, kur, pas gjithë kësaj batërdie që i bënë komunistët xhepave të shqiptarëve, dikush edhe mund ta ketë menduar se nuk ka demokratë që do të pyes pse në garën për të parin e kryeqytetit që Partia Socialiste e shkatërroi me themel, vetëm Edi Rama me partinë e tij të socialistëve hajdutë e ka të drejtën të propozoj edhe njërin prej atyre që presin në radhë te SPAK-u për t’u arrestuar, dhe do ti binden altoparlantëve të Sigurimit të Shtetit që thonë se opozita na qenka në hall, Saliu nuk duhet të duket vërdallë dhe kandidati i opozitës nuk duhet të jetë opozitar, larg qoftë i PD!
Sigurimi i Shtetit mund të jetë bindur se demokratët nuk e kanë më të drejtën e fjalës në këtë kohë kolere, por e drejta e tyre për të lexuar dhe shikuar hedhë poshtë si kandidatin e shoqërisë civile, Adriatik Lapajt dhe Agron Shehajt, sepse vijnë nga e njëjta gropë ku ujërat e pijshëm dhe ato të zeza janë bashkuar 17 Nëntorin e vitit 1944.
Demokratët sot mund të mos pyesin pse Florjan Binaj ia futi vrapit dhe iku nga Adriatik Lapaj ndërsa po formonin parti, ose nga doli Ermal Hasimja më opozitar se Sali Berisha kur doli nga koteci i Agron Shehajt, por ishte e qartë se që të dy kandidatët i përbashkonte idiotizmi komunistë, “Fajet i ka Saliu”, ndërsa opozitar mund të jenë vetëm në ekranet e televizioneve kombëtare që i ka kontrolluar dhe i kontrollin Sigurimi i Shtetit!
Për t’ju vulosur këtë qartësi demokratëve i shërbeu dalja e parë e Florjan Binajt pas zyrtarizimit të tij si kandidat i opozitës për Kryetar të Bashkisë Tiranë, ku në krah kishte Ermal Hasimjen dhe vërejtjen e parë në maje të gjuhës, nuk kishte punë me Saliun!
Demokratët nuk u magjepsën nga konfirmimet e Florjan Binajt se nuk i takon asnjë partie politike, kështu thoshte edhe Gabriel García Márquez, i cili besonte se bota një ditë do të bëhet socialiste sepse është një sistem i përparimit, lirisë dhe barazisë, gjë të cilën e mendojnë edhe prindërit e Binajt, partia që krijoi me Lapajn, dhe, Agron Shehaj me partinë që themeloi dhe nuk e dinë dhe nuk i intereson se çfarë është “checks and balances”; Sepse, thjeshtë, nuk ka demokratë që mendon kështu dhe nuk ka menduar që nga 11 Dhjetori 1990!
Sot, demokratët, të qartë se shumë nga radhët e tyre u zhdukën nga faqja e dheut sepse u prekën nga kjo kolerë ose dhe ranë pre e propagandës komuniste, duke pasur respekt për veten e tyre natyrisht se nuk do të votojnë një kandidat që nuk është pjesë e familjes së sakrificës së tyre!
Të vetëdijshëm se partia e idealit të tyre është në hall, nuk do dëgjojnë më as përrallat me protesta ku kërkohet dorëheqja e Kryeministrit Edi Rama përderisa PD nuk paska një kandidat; Sot, demokratët nuk do të dëgjojnë as përrallat me Rithemelimin që shpëtoi Partinë Demokratike, sepse ai rezultoi i pamjaftueshëm vetëm me Aktin e rizgjimit të vetëdijes për ekzistencë!
Po, sot, demokratët janë të qartë se për të shpëtuar ky vend duhet të largohet Edi Rama me shpurën e tij nga pushteti, por, i domosdoshëm është edhe Rithemelimi i Rithemelimit të PD, duke pasur gjithmonë parasysh atë që Albert Ajnshtajn e ka thënë shumë kohë më parë:
Ne nuk mund t’i zgjidhim problemet, me mënyrën e të menduarit që përdorëm kur i krijuam ato!
