Dialogu Kosovë-Serbi, Osmani dhe Kurti me të dërguarin e BE: Serbia po i shkelë marrëveshjet!
Përfaqësuesi i Posaçëm i Bashkimit Evropian për Dialogun Kosovë-Serbi, Peter Sorensen, zhvilloi takime të ndara në Munich ku po mbahet Konferenca e Sigurisë, me Presidenten e Kosovës, Vjosa Osmani, dhe Kryeministrin Albin Kurti, ndërsa u diskutua për të ardhmen e dialogut Kosovë-Serbi.
“Në këtë takim të parë ndërmjet tyre, kryeministri Kurti uroi z. Sørensen për pozitën dhe përgjegjësitë e reja, teksa veçoi progresin e Kosovës në katër vitet e fundit, me theks te rritja ekonomike mesatare prej 6%, raporti i fundit i BE-së për vendin, që evidenton progres në 36 nga 38 fushat e vlerësimit dhe asnjë fushë me regres, pastaj rishpërndarja sociale, sundimi i ligjit, lufta kundër korrupsionit dhe avancimi i të drejtave politike e lirive civile. Ai tha se Kosova është shembull se si zhvillimi dhe demokracia shkojnë krah për krah,” thekson Zyra e Kryeministrit përmes një komunikate për takimin ku Kryeministri foli dhe për rëndësinë e zbatimit të plotë të Marrëveshjes Bazike të Brukselit të vitit 2023 dhe aneksit të saj.
“Në të njëjtën kohë, ai tha se kjo marrëveshje po vazhdon të shkelet e të mos respektohet nga Serbia, e cila gjithashtu refuzon nënshkrimin e saj dhe përmes letrës së ish-kryeministres Bërnabiq, praktikisht Serbia është tërhequr nga marrëveshja. Për të ecur përpara nevojitet nënshkrimi i marrëveshjes, tërheqja e letrës së ish-kryeministres Bërnabiç dhe dorëzimi i kryeterroristit Milan Radoiçiç, për të cilin tashmë ka aktakuzë 160 faqesh nga Prokuroria e Republikës së Kosovës,” thekson Zyra e Kryeministrit për takimin i cili u zhvilloi në Munich me Peter Sorensen duke përfunduar:
“Kryeministri Kurti tha se është absurde që Presidenti i Serbisë ia imponon dorëheqjen kryeministrit të Serbisë, Milosh Vuçeviq, por nuk e dorëzon Radoiçiqin.”
Ndërkoh Presidentja e Kosovës, Vjosa Osmani, bëri të ditur se në takim me të dërguarin e posaçëm të Bashkimit Evropian për dialogun Kosovë-Serbi, Peter Sorensen, i diskutuan pritshmëritë e këtij dialogu.
“Në takimin tim të parë me Përfaqësuesin e ri të BE-së për Dialog, Peter Sørensen, diskutuam mbi zhvillimet e fundit në vend dhe pritshmëritë nga dialogu i Brukselit,”u shpreh Vjosa Osmani pas takimit në rrjetin social Facebook ndërsa përfundoi:
“Do të vazhdojmë të punojmë me aleatët tanë që ky proces të përmbyllet me njohje të ndërsjellë dhe mbrojtjen e sovranitetit, kushtetutshmërisë dhe integritetit territorial të Republikës sonë.”
