Osmani: Është koha që masat e padrejta të largohen! Von der Leyen: Duhet ende punë!

Ndonëse edhe në raportin e fundit mbi Sundimin e Ligjit, World Justice Project, WJP, e rendit Kosovën shumë para Serbisë, si dhe shtetin serb shumë më të korruptuar se atë kosovar, Presidentja e Komisionit Evropian, Ursula vond der Leyen, e cila dje në Beograd tha se Serbia ka përparuar shumë, sot në Prishtinë tha se duhet ende punë për heqjen e masave të BE ndaj Kosovës.

Presidentja Vjosa Osman pas takimit me Presidenten e KE, Ursula von der Leyen, kërkoi heqjen e masave të BE-së për Kosovën ndërsa akuzoi Sebinë se po vazhdon të jetë satelit i Rusisë në Ballkan.

“Fat i keq për sigurinë e rajonit është që në Ballkanin Perëndimor një shtet vazhdon të jetë sateliti më i fortë i Rusisë në Evropë, e ajo është Serbia. Është koha e fundit që vendosmëria që BE ka treguar ndaj Rusisë, të tregohet edhe ndaj satelitëve dhe shërbyesve të Rusisë në rajonin tonë. Kjo është me rëndësi sa i përket përgjegjësisë së Serbisë për aktiv e agresionit ndaj Kosovës të kryer përmes forcave paramilitare terroriste në shtator gjë që sipas Shtëpisë së Bardhë ka pasur për qëllim të destabilizojë jo vetëm Kosovën por tërë Ballkanin Perëndimor,” tha Vjosa Osmani duke shtuar se sot Kosova ka nevojë që Bashkimi Evropian t’i vlerësoj arritjet e saj

“Është koha e fundit që masat e padrejta ndaj Kosovës të largohen përfundimisht. Përveç të padrejta, këto masa po dëmtojnë qytetarët dhe kanë dëmtuar procesin e dialogut duke e bërë atë tërësisht të pabalancuar, pabarabartë dhe të pakredibilitet. Heqja e masave është reflektim i nevojave të të gjithë qytetarëve të Kosovës, por do ishte edhe përgjigje ndaj plotësimit të parakushteve që vetë BE-ja i kishte vënë në raport me Kosovën sa i përket këtyre masave,” tha Presidentja Osmani ndërsa e vlerësoi Planin e Rritjes si jashtëzakonisht të rëndësishëm për Kosovën dhe shtetet tjera në Ballkanin Perëndimor.

“Mezi presim që të zbatojmë reformat e përfshira në këtë plan dhe të përfitojmë sa më shumë.  Kosova për gjatë kësaj kohe do të përfitoj 882 milionë euro nga fondet e Be-se, si përfituesja më e madhe për kokë banori, nga të gjitha shtetet tjerë përfituese.”

Por gjithë ky përkushtim kosovar nuk mjafton për Presidenten e Komisionit Evropian, e cila sheh përparime të mëdha në Serbi por jo dhe në Kosovë, ndonëse World Justice Project sa i përket sundimit të ligjit, e rendit Kosovën në vendin e 58 nga 142 shtete ndërsa Serbinë në vendin e 94, dhe si vend shumë më të korrptuar Serbinë në vendin 93 deri sa Kosova sipas WJP renditet në vendin e 65!

Thjeshtë, Ursula vond der Leyen tha se duhet punuar për hapat e mëtejshëm që të arrihet në një pikë ku shtetet anëtare të Bashkimit Evropian të binden për heqjen e masave ndaj Kosovës.

“Është shumë e rëndësishme të punojmë së bashku, dhe ne kemi mirëpritur hapjen e kufirit dhe avancimin në CEFTA dhe pas kësaj duhet të punojmë për hapa të mëtejshëm që të arrijmë në një pikë ku mund të hiqen masat dhe kjo do të ndihmojë të binden shtetet anëtare, pasi siç e dini të gjitha shtetet anëtare duhet të jenë dakord për heqjen e masave. Ne të dyja, jemi të përkushtuara të gjejmë hapat e nevojshëm për të arritur këto qëllime. E rëndësishme ta shohim Kosovën si partneren tonë dhe ta bëjmë të mundur rrugën e Kosovës drejt BE-së,” tha Presidentja e KE duke vazhduar ta fyej Kosovën edhe në Prishtinë, pas masave që i vendosi vitin e kaluar pas trazirave në veri, për të cilën ndërkombëtarët fajësuan Qeverinë Kurti se nuk ndërmori hapa për ta shtensionuar situatën, por, nuk kërkuan falje kur me aktin terrorist serb në Banjskë u konfirmuan paralajmërimet e Kryeministrit Albin Kurti mbi rrezikun e veprimit serb.

Dhe, në Kosovën me masa të BE, sot Presidentja e KE u tall duke fol për zgjerimin në krye të agjendës së mandatit të dytë në krye të Komisionit Evropian.

“E di që viteve të fundit Kosova ka punuar shumë për ta përforcuar demokracinë dhe sundimin e ligjit dhe dua t’iu siguroj juve dhe Kosovës se në mandatin e tim të dytë zgjerimi do të jetë në krye të agjendës. Për mua është njëra prej projekteve më të mëdha. Për këtë arsye do të punojmë bashkë që të vazhdojmë tutje sepse jam e përkushtuar për një të ardhme ku të gjitha shtetet e Ballkanit Perëndimor t’i kenë të gjitha mjetet dhe instrumentet e nevojshme që ta bëjmë këtë realitet.”

Presidentja e KE, Ursula Von der Leyen, dekurajoi Prishtinën zyrtare edhe me qëndrimin ndaj Rusisë kur dihet qëndrimi kosovar dhe ai serb, ndërsa u pyet për refuzimin e djeshëm në Beograd për ta takuar Kryeministrin e Serbisë, Milosh Vuçeviç. Ndonëse zëdhënësi i KE, Eric Mamer, kishte sqaruar për mediat serbe se takimi me Kryeministrin e Serbisë ishte anuluar pasi që në të njejtën ditë kur duhej ta takonte Presidenten e KE ai kishte takuar ministrin e Zhvillimit Ekonomik të Rusisë, Maksim Reshetnikov, Vond der Leyen nuk e pranoi arsyen por filloi të flas për Presidentin e Serbisë, Aleksandar Vuçiç. 

“Për mua ishte mesazh i qartë që presidenti i Serbisë më priti në takim, dhe para meje priti në takim kryeministrin e Polonisë dhe e Greqisë, në vend se të shkonte në Kazan. Ishte mesazh shumë i qartë!”

Ndërkohë dhe Kryeministri i Kosovës, Albin Kurti, ka zhvilluar takim Presidenten e Komisionit Evropian, Ursula von der Leyen.

Turin e saj ballkanik, Presidentja e Komisionit Evropian, Ursula von der Leyen, e përfundon sot me vizitën në Mal të Zi.