Osmani, Konjufca dhe Kurti, homazhe në varrezat e dëshmorëve në Velani

Presidentja e Kosovës, Vjosa Osmani, Kryeministri Albin Kurti dhe Kryetari i Parlamentit Glauk Konjufca kanë bërë homazhe tek varrezat e dëshmorëve të Prishtinës në Velani. Me këtë rast presidentja Osmani tha se sot është një prej ditëve kur të gjithë bëhen bashkë për të nderuar sakrificën sublime që secili nga dëshmorët e këtij rajoni e bëri që ne të gëzojmë lirinë.

“Është dita kur ne duhet t’u flasim brezave të ri për trimërinë e dëshmorëve të Kosovës, dëshmorëve të cilët si pjesë e luftës sonë çlirimtare dhe UÇK-së ranë duke e mbrojtur Kosovën. Ranë duke treguar se sakrifica për liri dhe atdhe është dashuria më sublime që mund të ketë një njëri”, tha Vjosa Osmani duke shtuar se sot përkujtohen të gjithë ata,  duke ia përkujtuar edhe vetvetes së udhërrëfyesi më i ndritshëm për ne është rruga që ka ndërtuar secili dëshmorë.

Ndërkohë Kryeministri i Kosovës, Albin Kurti, shprehet se gjithë këto jetë të humbura, janë çmimi i paguar për lirinë e pavarësinë e që duhet t’i gëzojnë të gjithë pa dallim.

“Prilli vazhdon të jetë muaj i përkujtimeve të masakrave, krimeve e gjenocidit që kanë ndodhur në Kosovë gjatë luftës së fundit. Këto masakra janë vazhdimësia e tragjedisë së përjetuar nga populli shqiptar i Kosovës gjatë luftës. Janë gjaku ynë që nuk falet. Dhimbja që nuk ndalet,” shprehet Kryeministri Albin Kurti duke shtuar se ne sot përkulemi para familjeve dhe dhimbjes që ato kanë, me premtimin se do të bëjmë krejt çka mundemi e dijmë për të adresuar nevojat e tyre.