Osmani: Kosova kujton viktimat e gjenocidit, BE shpërblen Serbinë

Në Ditën Ndërkombëtare të Viktimave të Gjenocidit, Nënkryetarja e LDK-së, Vjosa Osmani, thekson se deri sa Kosova në këtë ditë kujton ata që humbën jetën si pasojë e politikave gjenocidiale të shtetit serb, Bashkimi Evropian shpërblen Serbinë me hapjen e një kapitulli të ri në procesin e integrimit evropian .

“Në ditën ndërkombëtare të kujtimit të viktimave të gjenocidit, kujtojmë të gjithë ata që humbën jetën si rezultat i politikave gjenocidale të shtetit serb, dhe në veçanti fëmijët e vrarë e të masakruar nga ky regjim,” thekson Vjosa Osmani përmes një reagimi në rrjetin social Facebook duke shtuar se nga ana tjetër shteti serb po vazhdon që të mohojë këto krime, derisa, nuk shpreh keqardhje për viktimat e pafajshme.

“Edhe pas më shumë se dy dekadash, shteti serb vazhdon me politikën e mohimit të këtyre krimeve, nuk shprehë keqardhje për viktimat e pafajshme dhe tenton të rishkruaj historinë edhe pse krimet serbe ndodhën para syve të të gjithë botës”, thotë ajo.

Dhe jo vetëm kaq! Derisa në Kosovë kujtohen ata që humbën jetën në luftën e fundit, Nënkryetarja e LDK-së, Vjosa Osmani, thekson se BE shpërblen Serbinë në procesin e integrimit evropian.

“Përderisa ne sot kujtojmë të gjithë ata që humbëm, Bashkimi Evropian, pikërisht sot, po e shpërblen Serbinë me hapjen edhe të një kapitulli në procesin e integrimit evropian.”