Osmani: Krenar me policët që shërbejnë në veri! Kurti: Policët prishën rehatinë e bandave në veri!

Policia është mburoja e shtetit, tha Presidentja Vjosa Osmani, në cermoninë e diplomimit të gjeneratës së 58-të të Policisë së Kosovës, duke e cilësuar domosdoshmëri anëtarësimin e Republikës Kosovës në Interpol dhe Europol.

“Sot, të gjithë së bashku, të shprehim edhe një herë falënderimin dhe krenarinë tonë të pashoq me policët e policet tona që po shërbejnë në veriun e vendit tonë për ta mbrojtur çdo pëllëmbë të Republikës së Kosovës,” tha Vjosa Osmani duke u shprehur e lumtur që në mesin e kadetëve të rinj ka edhe pjesëtarë të komuniteteve joshumicë, gjithsej 85, dhe vajza e gra, gjithsej 47.

Ndërsa Kryeministri Albin Kurti duke folur për rrugën e gjatë dhe me sfida që pret policët e rinj theksoi se si sot zyrtarët policorë janë në shënjestër të sulmeve të njëpasnjëshme në veri të vendit, që sipas tij ishte, zonë e rehatisë për brandat kriminale të udhëhequra nga Beogradi.

“Pikërisht për shkak të këtij aktiviteti të shtuar policor edhe në atë zonë ka pasur sulme të njëpasnjëshme ndaj zyrtarëve tanë, nga të cilët 25 zyrtarë janë lënduar lehtë, një është plagosur dhe një ndodhet aktualisht në trajtim mjekësor pas lëndimit që kishte marrë në aksionin e kriminelit famëkeq Llune”, tha Kurti gjatë ceremonisë së diplomimit të gjeneratës së 58-të të Policisë së Kosovës.

Duke u shprehur krenar për Policinë e Kosovës, e cila po zbaton ligjin në tërë territorin e Kosovës, Ministri i Punëve të Brendshme, Xhelal Sveçla, tha se sulmet ndaj zytarëve të Policisë së Kosovës janë intensifikuar dhe tha se ata po përballen me banda kriminale në veri të vendit.

Ndryshe, sot në sallën “1 Tetori” në Prishtinë, u mbajtë Ceremonia e Diplomimit të gjeneratës së 58-të të Policisë së Republikës së Kosovës, ku diplomuan 419 kadetë të rinj.