Pa akuzë dhe pa prova, GjKKO e Apelit lë në arrest shtëpie Kryetarin e PD

Gjykata e Posaçme e Apelit për Korrupsionin dhe Krimin e Organizuar, GJKKO e Apelit, ka lënë në fuqi masën e sigurisë arrest shtëpie për Ish-Kryeministrin dhe Kryetarin e Partisë Demokratike, Sali Berisha.

Pas shpalljes së vendimit nga GJKKO e Apelit, avokati i Kryetarit të PD, Genc Gjokutaj, tha se SPAK dhe GJKKO ndjekin proçedurën politike ndaj liderit të opozitës e për pasojë kanë rrëzuar kërkesën për revokimin e masës së sigurisë ndaj tij.

“SPAK-u nuk ka kryer asnjë veprim hetimor që të jetë në themel të hetimit dhe argumentimit të fajësisë që ata pretendojnë. E kam thënë që zgjatja e afatit merret në raste ekstreme kur SPAK të ketë konsumuar të gjithë kohën e vënë në dispozicion nga ligjvënësi dhe në momentin që është shfrytëzuar kjo kohë maksimalisht kanë mbetur veprimet e tjera hetimore për ty kryer merret një zgjatje.

Zgjatja e këtij procesi ecën me kalendarin politik kur e ka ndarë kryeministri dhe siç ka urdhëruar regjistrimin e çështjes ai e di se lidhen me lojërat politike, skadimi i mandatit zgjedhjet dhe janë këto afate që përcaktojnë këto afate,” tha avokati Genc Gjokutaj.

Njoftimi:

Gjykata e Posaçme e Apelit për Korrupsionin dhe Krimin e Organizuar, me trup gjykues monokratik të përbërë nga gjyqtarja Iliriana Olldashi, sot më 17.04.2024, shpalli vendimin mbi çështjen penale nr. 82 akti, datë 09.04.2024 regjistrimi, regjistruar mbi ankimin e personave nën hetim/ankues S.B. dhe J.M., me objekt: “Ankim ndaj vendimit nr. 125, datë 12.03.2024 (disponuar mbi kërkesën me obj0ekt revokimi i masës së sigurimit personal “Arrest në shtëpi”) dhe vendimit nr. 166, datë 10.03.2024 (disponuar mbi kërkesën për përjashtim gjyqtari) të Gjykatës së Posaçme të Shkallës së Parë për Korrupsionin dhe Krimin e Organizuar”, dhe vendosi:

Miratimin e vendimit nr. 125, datë 12.03.2024 të Gjykatës së Posaçme të Shkallës së Parë për Korrupsionin dhe Krimin e Organizuar.