Pa çertifikatë vaksinimi në kufi, Komiteti: Hiqen maskat Anticovid, lejohet muzika pas orës 23:00
Pas analizës së situatës epidemiologjike Komiteti Teknik i Ekspertëve në mbledhjen e sotme ka vendosur të heq detyrimin për mbajtjen e maskave, të lejohet muzika pas orës 23:00 dhe duke filluar nga data 1 maj, çdo qytetar do të hyjë në Shqipëri pa çertifikatë vaksinimi.
Shqipëria është vendi i dytë në rajon për administrimin e dozave të vaksinës, tha Silva Bino, dhe se tek moshat e reja është vënë re një mbulesë e ulët vaksinale, dhe kjo sjell edhe vaksinimin në rang vendi.
“Kemi akoma qarkullim të shtamit Ba1, Ba2. Shtamet e Covid-19 po pësojnë mutacione të vazhdueshme, ndaj risku mbetet aktual, pavarësisht uljes së rasteve. Në Shqipëri kanë ardhur rreth 3 milionë doza të vaksinës, vaksina më e përdoru në vend është vaksina Pfizer. Në kemi një mbulesë me një dozë rreth mbi 50 %. Mund të themi se rreth gjysma e popullatës është vaksinuar me vaksinën kundër COVID,” tha Bino.
Duke nisur nga analiza e këtyre treguesve epidemiologjikë dhe nga shifrat e vaksinimit që sapo përmendi Prof. Silva Bino, kreu i Komitetit Teknik të Ekspertëve, Mira Rakacolli tha se u vendosën këto rekomandime:
1. Bazuar në rekomandimin e Komitetit të Ekspertëve të Vaksnimit, vaksinimin me dozë të katërt të qytetarëve mbi 60 vjeç dhe të atyre me sistem imunitar të kompromentuar sipas rekomandimit të mjekut të familjes.
2. Heqjen e detyrimit për mbajtjen e maskave, por rekomandon fuqishëm mbajtjen e tyre në ambiente të mbyllura e sidomos në ato të paajrosura mirë.
3.Lejimin e muzikës pas orës 23:00 dhe rihapjen e klubeve të natës.
4. Heqjen e detyrimit për të paraqitur dokument vaksinimi për Sars Cov2, dokument të testimit negativ për infeksionin SarsCov2 apo certifikatë shërimi nga ky infeksion për të gjithë shtetasit që hyjnë në Shqipëri nga çdo pikë kufitare, duke filluar nga data 1 maj e këtij viti,” tha Mira Rakacolli duke bërë të ditur se Komiteti i Ekspertëve do të vazhdojë të monitorojë më vëmendje situatën dhe këto masa do të vlerësohen në dinamikë duke u bazuar në nivelin e riskut brenda vendit apo në botë dhe do të ndryshojnë sipas nivelit të këtij risku apo ashtu siç është dhe rekomandimi i OBSH-së.
