Pa panik, ISHP: Asnjë rast i dyshuar me koronavirus në vend!

Drejtuesja e departamentit të epidemiologjisë në Institutin e Shëndetit Publik, Silva Bino, duke informuar sot për situatën në vend dhe masat e marra nga autoritetet për koronavirusin, i cili në Itali sa shkon dhe rëndohet tha se nuk ka vend për panik dhe se në Shqipëri nuk ka asnjë rast të dyshuar.

“Nuk duhet të ketë panik për momentin nuk kemi asnjë rast të dyshuar në Shqipëri. E rëndësishme të jemi vigjilentë, jo vetëm por dhe të kujdesshëm për veten dhe të afërmit tanë. Ky virus nuk luftohet vetëm nga strukturat qeveritare por dhe duke u kujdesur,” tha Bino duke dhënë edhe ca këshilla:

“Mos pështyjmë përtokë, të vendosim gropëzën e bërrylit kur tështimë. Mos prekim hundën, gojën. Janë disa rregulla të thjeshta sanitare. Ky është një virus i thjeshtë. Përhapet po në atë rrugë që përhapet virusi i gripit. Gripin nuk e marrim në konsideratë shpesh herë por ky virus ka një vdekshmëri disi më të lartë se gripi. Kjo është këshilla e parë, duhet të kujdesemi për higjienën”

Instituti i Shëndetit Publik, tha ajo, e përcakton diagnozën e koronavirusit në vend dhe se ka disa pajisje që janë për diagnostifikim.

“Nuk ka veç një pajisje por disa pajisje që ndihmojnë njëra-tjetrën. Ka të gjitha kitet, të gjithë reagentët për t’u kryer diagnoza e koronavirusit në vend. Laboratori i ISHP është pjesë e rrjetit të laboratorëve europianë. Ne jemi të pajisur, të kontrolluar. Ne jemi në atë hap që janë gjithë vendet e tjera të botës dhe sidomos të Europës,” tha Silva Bino duke shtuar se janë përforcuar masat në kufi dhe apeloi që të gjithë ata që udhëtojnë drejt apo nga zonat e prekura të njoftojnë për çdo shqetësim.

“E di që të gjithë e keni mendjen atje. Ju bëj thirrje të gjithë qytetarëve që udhëtojnë, të jenë të kujdesshëm dhe të raportojnë çdo shqetësim shëndetësor. Në aeroport ndodhet njësia e inspektoratit sanitar e përbërë nga mjekë e personel shëndetësor. Virusi në asnjë vend të botës nuk mund të ndalet në aeroport. Ka shumë diskutime për skanerat, për temperaturat. Por nga të gjitha studimet është treguar se ato nuk kanë ndonjë vlerë në kapjen e hershme. Kapja e hershme vetëm nëpërmjet sistemit shëndetësor. Shqipëria është një vend që ka një eksperiencë shumë të mirë në gjurmimin e kontakteve. Javës që shkoi provuam një testim të vetes sonë për të parë sa shpejt i kapim kontaktet. Sepse është e rëndësishme kapja e kontaktit dhe më tej marrja e masave për izolimin.”

Në fund, Drejtuesja e departamentit të epidemiologjisë pranë Institutit të Shëndetit Publik, Silva Bino, duke sqaruar se karantina është vend për të shëndoshët dhe iu kërkoi qytetarëve të kenë besim tek autoritetet, përgënjestroi lajmin se në qendrën e sapo inauguruar të shëndetit mendor në Kavajë do ketë një pikë karantine.

“Në qoftë se kemi një kontakt me të sëmurin, ai sipas kushteve futet në vetëkarantinë, në qoftë se kushtet e tij e lejojnë ose futet në një karantinë të përcaktuar mirë, e cila është e përcaktuar në momentin që flasim dhe është një strukturë spitalore. Kemi përzgjedhur një strukturë spitalore për kushtet e mira.

Janë përzgjedhur dhe struktura të tjera që i plotësojnë këto kushte. Kemi përcaktuar rregullat qoftë për karantinën në shtëpi, qoftë për në struktura të tjera.

Është normale që njerëzit të kenë frikë por nuk duhet të ketë panik. Kini besim tek strukturat, kini besim tek ne dhe tek mua që po flas sepse shpesh e shoh që ka dyshime”, deklaroi Bino, e cila shpjegoi se koronavirusi merret nëpërmjet spërklave të pështymës dhe jo frymëmarrjes.”