Padi për Gjonajn në SPAK, Meta: Akt mafioz i celulës së strukturuar në krye të…

Presidenti i Republikës, Ilir Meta pasi ka dorëzuar personalisht padinë në SPAK për ministren e Drejtësisë, Etilda Gjonaj, e vlerësoi si ngjarjen më të rëndë në historinë e shtetit tonë, akt mafioz i cili, sipas tij, në bazë  të provave rezulton e përfshirë direkt edhe celula e strukturuar në krye të Ministrisë së Drejtësisë.

“E dorëzova vetë sepse mbrojtja e kushtetutës dhe integritetit të Gjykatës Kushtetueses është sot detyrë mbi detyrat për çdo shqiptar të ndershëm dhe patriot dhe në radhë të parë kryedetyra dhe misioni i presidentit të vendit. Nuk ka ndodhur ngjarje më të rëndë në historinë e shtetit tonë se ky akt mafioz ku së fundmi në bazë  të provave rezulton e përfshirë direkt edhe celula e strukturuar në krye të Ministrisë së Drejtësisë që përmes shkeljes së kushtetutës dhe dhunimit të shumë ligjeve dhe falsifikimeve të provuara ka tentuar grusht shteti duke rrëmbyer haptazi në mënyrë mafioze kompetencën që kushtetuta ia jep vetëm presidentit,” tha Ilir Meta duek vlerësuar se këto fakte tronditëse ishte e domosdoshme ti sillte vetë presidenti i Republikës.

“Padi bëmë për tre titullarë të lartë me në krye ministren ende në detyrë, po vlerësojmë prova të tjera dhe persona të tjerë të përfshirë për të çuar deri në fund shpartallimin jo vetem te grushtit te shtetit, por per te shpetuar kushtetuesen nga kjo bande teper e rrezikshme”.

Ndonëse solli vetë “murtajën rilindje” në pushtet, Iir Meta ftoi sot shqiptarët që në përvjetorin e Internacionales Komuniste, 2 Mars, të dalin në shesh për të shpëtuar vendin nga kjo murtajë:

“Nuk ka ndodhur në asnjë vend të Europës që të shkelet kushtetuta në këtë mënyrë. Nuk ka asnjë vend që të ketë ngelur asnjë minutë pa Gjykatë të Lartë. Nuk ka ndodhur asgjëkund një grusht i tillë shteti. Puna, provat dhe implikimi vazhdon. Të gjithë i pres në 2 mars kundër murtajës që do të zhbëjë shtetin e së drejtës dhe të ekzekutojë përfundimisht Kushtetutën e të gjithë shqiptarëve.”