Pagat për bluzat e bardha rriten me 40%, ato të arsimtarëve me 15%, hyjnë në fuqi në 1 janar 2021

Pagat për bluzat e bardha do të rriten me 40 për qind, ndërsa pagat për arsimtarët e sistemit parauniversitar në masën 15 për qind. Këto masa si dhe rritja e pagës minimale do të hyjnë në fuqi duke filluar nga 1 janari i vitit 2021, tha Kryeministri Edi Rama.

“Sot zyrtarisht njoftojmë rritjen e pagave për të gjithë bluzat e bardha dhe për arsimtarët. Në këto kushte pavarësisht shtrëngesave të krijuara nga dy goditje njëra pas tjetrës, tërmeti dhe covid, kemi detyrimin që t’iu japim sot një mbështetje të fortë për të shpërblyer mundin, profesionalizmin, angazhimin në dy kategori shoqërore, një kategori e lëvizshme, për ata që marrin shërbimin shëndetësot dhe një kategori e palëvizshme që janë femijët, si dhe për të nxitur motivimin dhe cilësinë në rritje të dy shërbimeve jetike për të sotmen dhe të ardhmen.

Pagat për bluzat e bardha do të rriten me 40 për qind. Dhe paga për arsimtarët 15 për qind, për arsimtarët e sistemit parauniversitar. Paga minimale do të hyjë në fuqi nga 1 janari 2021, detajet i japim javën e ardhshme”, deklaroi kryeministri Rama.

Ministrja e Financave dhe Ekonomisë Anila Denaj tha se rritja për bluzat e bardha dhe arsimtarët ka një kosto prej 8 miliardë lekë në buxhetin e shtetit.

“Qeveria miraton këtë javë rritje pagash për punonjësit në arsim dhe shëndetësi. Kjo ka një kosto në buxhetin e shtetit, ku llogaritet në 8 miliardë lekë. Rritja e pagave do të hyjë në fuqi më 2021. Në sistemin shëndetësor paga për funksion për mjekët është 57 mijë lekë, 79.800 lekë. Për Infermierët e laborantët paga do të rritet nga 37 mijë lekë në 58 mijë e 810 lekë.

Nga rritja përfitojnë 18 415 punonjës të sistemit shëndetësor, nga të cilët 4650 mjekë dhe 13 765 infermierë. Ndërsa në sistemin parauniversitar arsimor përfitojnë nga rritja 35 883 punonjës .

Për mësuesit e sistemit arsimor 9-vjeçar, paga shkon nga 65 mijë lekë në 72 mijë lekë. Për mësuesit në gjimnaz, paga nga 69 mijë lekë në 76 mijë lekë”.

Më tej, kreu i qeverisë deklaroi se edhe fondi i përgjithshëm i pagave në sektorin publik është dyfishuar në dy mandate qeverisëse.

“Me një numër punonjësish në sektorin publik që është më i vogël se sa numri i punonjëse në vitin 2013, fondi i pagave i përgjithshëm është rritur nga 450 milionë dollarë në 2013 në 710 milionë dollarë sot. Që do të thotë në dy mandate qeverisëse është thuajse dyfish fondi i pagave në sektorin publik, me të njëjtin numër punonjës, që po e marrim gati njësojë me vitin 2013.

Shifra e tretë që dua t’iu jap, kursimi nga taksimi i ndërshëm në Shqipëri është 21 milionë dollarë në vit, dhe 166 milionë dollarë në këto vite”./Monitor/