Pajisje efiçiente për ngrohje, Qeveria e Kosovës subvencionon 30 milionë euro

Sot ministrja e Ekonomisë, Artane Rizvanolli, lançoi thirrjen e tretë për subvencionimin e pajisjeve efiçiente për ngrohje, e cila do të jetë e hapur në platformën e-Kosova.

“Këtë vit jemi duke investuar për herë të parë shifër rekord prej 30 milionë eurosh, investime në sektorin e banimit, pra për qytetarët, për familjet, që është shuma më e madhe e investuar deri më tani në efiçiencën e energjisë në Kosovë, falë përkrahjes financiare të BE-së, në kuadër të pakos emergjente për energji prej 75 milionë eurove, që është vlera më e lartë për kokë banori në rajon të cilën ka përfituar Kosova nga kjo pako,” tha Artane Rizvanolli duke shtuar se ministria që ajo drejton ka filluar zbatimin e programit të efiçiencës së energjisë në sektorin rezidencial e që kap shifrën prej 10 milionë euro dhe përfshin investime në pajisje ngrohëse efiçiente, pajisje shtëpiake efiçiente e sisteme solare për ngrohjen e ujit, ku parashihet të përfitojnë rreth 20 mijë qytetarë.

Për 35 ditë, tha ajo, kanë aplikuar 3750 qytetarë, që tregon interesimin e madh të qytetarëve në investimin në pajisje efiçiente.

“Në vazhdimësi të këtyre masave sot subvencionojmë thirrjen e tretë që subvencionon investime në pajisje ngrohëse eficiente si: pompë termike, kondicionerë, klimë të tipit inverter me efiçiencë të lartë, kaldaja e stufa individuale me biomasë, si druri e peleti,” tha ministrja Rizvanolli duke saktësuar se investimet në këtë masë janë të rëndësishme për të rritur efiçiencën e energjisë për sektorin e banimit.

“Thirrja për subvencionim të pajisjeve efiçiente të ngrohjes do të jetë e hapur në platformën: e-Kosova,” bëri të ditur ministrja Artane Rizvanolli duke folur për rreth 907 familje që jetojnë në asistencë sociale dhe që do të ndihmohen në ngrohje, derisa shtoi se rreth 2000 familje do të përfitojnë në izolim të shtëpive të tyre.