Pajisjet elektronike, Shqipëria me çmimet më të larta në Europë
Në vitin 2023, Shqipëria kishte të ardhurat për frymë sa 35 për qind e mesatares europiane, duke u renditur e fundit, por nga ana tjetër ka çmimet më të larta për pajisjet elektroshtëpiake në të gjithë Europën në të njëjtin vit.
Të dhënat e sotme të Eurostat tregojnë se çmimet e pajisjeve elektroshtëpiake në Shqipëri janë 131.7 për qind më të larta se mesatarja e çmimeve në BE me 2023 (BE=100), duke e renditur vendin tonë në krye të vendeve për çmimet e larta në këta artikuj që kanë peshë në shportën e mallrave.
Shqiptarët paguajnë me çmime më të larta një cilësi relativisht të dobët të pajisjeve. Mungesa e kontrollit mbi tregjet bën që në Shqipëri të shiten kopje të markave të njohura që prishen shpejt dhe nuk ofrojnë cilësi gjatë përdorimit.
Gjithashtu, Shqipëria u rendit e dyta pas Finlandës për çmimet e larta të pajisjeve elektronike me 133% të mesatares së BE.
Shqiptarët paguajnë më shtrenjtë se mesatarja e BE-së për veshjet dhe këpucët. Sipas Eurostat, çmimet e këpucëve në vendin tonë gjatë vitit 2023 ishin së paku 15.9 për qind më të larta se mesatarja e BE, ndërsa ato të veshjeve 2.3 për qind më të larta.
Eurostat e renditi Shqipërinë të dytën në rajon pas Serbisë për çmimet e larta të ushqimeve dhe pijeve. Të dhënat tregojnë se në vitin 2023, çmimet e ushqimeve dhe pijeve në Shqipëri ishin sa 91 për qind e mesatares se BE -së.
Në Ballkan, çmimet më të lira të ushqimeve i ka Turqia me 63.9 për qind të mesatares se BE-së, te ndjekur nga Maqedonia e Veriut dhe Bosnja. Madje edhe vendet anëtare të BE-së si Polonia, Bullgaria dhe Rumania kishin çmimet e ushqimeve më të ulëta se Shqipëria,
Në vitin 2023, nivelet e çmimeve për shpenzimet e konsumit final të familjeve ishin të ndryshme në të gjithë BE-në.
Nivelet më të larta të çmimeve u regjistruan në Danimarkë – 143 për qind e mesatares së BE-së, Irlandë – 142 për qind dhe Luksemburg – 135 për qind. Ndërkohë, nivelet më të ulëta janë regjistruar në Bullgari dhe Rumani – secila 60 për qind dhe Poloni – 66për qind.
Në vitin 2023, niveli i çmimeve për alkoolin dhe duhanin ishte 3.2 herë më i lartë në Irlandën, vendin më të shtrenjtë, sesa në Bullgari, më pak i shtrenjtë. Nivelet më të ulëta të çmimeve për alkoolin dhe duhanin u regjistruan në Bullgari – 66 për qind e mesatares së BE-së, Poloni – 77 për qind dhe Rumani – 85 për qind.
Ndërkohë, nivelet më të larta janë regjistruar në Irlandë – 211 për qind, Finlandë – 170 për qind dhe Danimarkë – 133 për qind. Ky ndryshim i madh i çmimeve është kryesisht për shkak të dallimeve në taksat e këtyre produkteve.
Restorantet dhe hotelet renditen të dytat për sa i përket diferencës së nivelit të çmimeve, me nivelet më të ulëta të çmimeve të regjistruara në Bullgari – 52 për qind e mesatares së BE-së, Rumani – 65 për qind dhe Hungari – 72 për qind dhe më të lartat në Danimarkë – 152 për qind. Finlanda – 129 për qind dhe Irlanda – 128 për qind.
Veshjet u renditën në vendin e tretë për sa i përket ndryshimit të nivelit të çmimeve, me Spanjën – 81 për qind, Bullgarinë – 82 për qind dhe Hungarinë – 88 për qind që regjistronin çmimet më të lira të veshjeve, ndërsa më të shtrenjtat ishin në Danimarkë – 131 për qind, Çeki – 126 për qind dhe Estonia 118 për qind.
Pabarazitë u regjistruan gjithashtu për ushqimin dhe pijet joalkoolike, që variojnë nga 74 për qind e mesatares së BE-së në Rumani në 119 për qind në Luksemburg, pajisjet e transportit personal që variojnë nga 90 për qind në Sllovaki në 129 për qind në Danimarkë, dhe, elektronikën e konsumit të ndryshme nga 92 për qind në Itali në 113 për qind në Francë./Monitor/
