Paketa Antishpifje, Këshilli Europës: Goditje e rëndë për lirinë e shprehjes!

Komisionerja e Lartë e Këshillit të Europës për të Drejtat e Njeriut, Dunja Mijatoviç, duke i cilësuar projektligjet e qeverisë Rama në shkelje të standardeve Europiane të të drejtave të njeriut kërkon i konsideron ato si një goditje e rëndë për lirinë e shprehjes.

Mijatoviç, e cila ka qenë më herët Përfaqësuese e OSBE-së për Lirinë e Medias, e publikoi deklaratën në Facebook të Martën më 17 dhjetor.

“Jam thellësisht e shqetësuar kur mësova se këtë javë Parlamenti i Shqipërisë ka vijuar me ekzaminimin e dy projektligjeve, të njohura si “Paketa anti-shpifje.” Këto ligje kanë nevojë urgjente për përmirësim,” shprehete sot Dunja Mijatoviç përmes rrjetit social Facebook duke shtuar:

“Në të vërtetë, shumë nene janë jo në përputhje me standardet ndërkombëtare dhe europiane të të drejtave të njeriut, të cilat mbrojnë lirinë e shprehjes dhe lirinë e medias.

Jam në veçanti e shqetësuar se fuqi diskrecionare i jepen organeve rregullatore, me mundësinë për të imponuar gjoba të tepërta dhe për të bllokuar faqe interneti pa një urdhër gjykate, si dhe për vendosjen e rregullimit shtetëror për median online, gjë që mund t’i japë një goditje të fortë lirisë së shprehjes dhe lirisë së medias në vend. Ka rëndësi të jashtëzakonshme që të sigurohemi që interneti të mbetet i hapur dhe forum publik dhe që të mbizotërojë vetërregullimi në media, përfshirë median online.”

Mijatoviç i bëri thirrje Parlamentit të Shqipërisë të rishihkojë draftet aktuale dhe t’i sjellë ato në përputhje me standardet e Këshillit të Europës dhe çështjet gjyqësore të vendosura në Gjykatën Europiane të të Drejtave të Njeriut.

Ndryshe, Dunja Mijatoviç njihet në Shqipëri për kundërshtimin e saj të ashpër në vitin 2015 ndaj nismës së atëhershme të kryeministrit Edi Rama për kriminalizimin e shpifjes ndaj zyrtarëve të lartë./Reporter/