Paketa e ndihmës, BE propozon 750 mld €

Komisioni Evropian propozoi sot një Fond prej 750 miliardë euro, për t’iu ndihmuar vendeve të BE-së që t’i tejkalojnë pasojat ekonomike, të shkaktuara nga kriza e koronavirusit.

Ekonomitë e të 27 vendeve të bllokut janë shkatërruar nga pandemia, por disa prej tyre kanë qenë në borxhe edhe përpara saj.

Fondi do të përbëhet nga grante dhe kredi për secilin shtet anëtar të BE-së.

Ai u bë publik nga presidentja e Komisionit Evropian, Ursula von der Leyen, e cila do të shpjegojë se si do të paguhet fondi.

“Kjo ka të bëjë me të gjithë ne dhe është shumë më e madhe se kushdo prej nesh,” tha von der Leyen para Parlamentit Evropian duke shtuar:

Ky është momenti i Evropës!

Komisioneri për Ekonomi i BE-së, Paolo Gentiloni, tha se fondi është një pikë kthese.

Megjithatë, raporton RFE, pa miratimin e të gjitha vendeve anëtare, ai nuk mund të shkojë përpara.

Disa shtete kundërshtojnë marrjen e borxheve për vendet e tjera.