Paketa për Rimëkëmbjen e Biznesit/ Në zonat e prekura nga tërmeti, Basha: 5 Pika për të ndal Dimrin Ekonomik

Kryetari i Partisë Demokratike, Lulzim Basha, ka publikuar sot Paketën me 5 Pika për Rimëkëmbjen e Biznesit të prekur nga tërmeti shkatërrimtar që goditi Durrësin.

“Tërmeti i 26 nëntorit ka shkaktuar dëme të mëdha në ekonominë e Durrësit dhe zonave të tjera. Mijëra vende pune, biznesi i vogël dhe ekonomia prodhuese janë nën presion. Njësitë e hoteleri-turizmit përballen me rënie konsumi dhe i tremben reduktimit apo anulimit të prenotimeve,” thekson Lulzim Basha dhe me qëllim për të ndalur futjen e Durrësit në një “dimër ekonomik” me pasoja të rënda sociale që do të vinin nga reduktimi i numrit të të punësuarve, ulja e pagave të punonjësve dhe mbyllja e bizneseve, propozon masa për rimëkëmbjen e biznesit.

Për të mundësuar një rigjenerim të ekonomisë prodhuese, shërbimeve dhe biznesit të vogël në zonat e dëmtuara, Kryetari i Partisë Demokratike, Lulzim Basha,  propozon Paketën me 5 Pika:

1.Në propozimin e tij, Basha sugjeron: Anulimin e taksës së pasurisë dhe të gjitha taksave dhe tarifave vendore për periudhën e rindërtimit.

2.Përjashtimin e taksës për të ardhura për të gjitha subjektet që riinvestojnë nga fitimi për të rikuperuar dëmet e tërmetit.

3.Pezullimi i kontributeve të sigurimeve shoqërore dhe shëndetësore për periudhën deri në rikuperimin e kërkesave.

4.Përjashtimi i TVSH në të gjitha materialet, lëndët e para dhe aktivitetet dhe kapitalet të përdorura për rikuperimin e dëmeve.5.Po ashtu dhe pezullimin dhe anulimin e pagesave të faturave të energjisë dhe ujit gjatë kohës së katastrofës natyrore.