“Pakti për Universitetin” dështoi, sot studentët i rikthehen protestave
E pagëzoi “Pakti për Universitetin”, por bazuar në sjelljet e kryeministrit Edi Rama gjatë takimit me studentë dhe pedagogë më 18 Janar, më shumë i ngjante një Pakti për Kryeministrin! Kështu dhe rezultoi. Asgjë nga sa premtoi nuk realoi dhe sot studentët i rikthehen protestave.
Studentët për sot kanë paralajmëruar një protestë kombëtare në orën 12:00 para Ministrisë së Arsimit dhe arsye kryesore, sipas studentëve është, premtimet e pambajtura të kryeministrit lidhur me kërkesat e tyre.
Nëse kërkesat e tyre nuk plotësohen, ata paralajmëruan përshkallëzimin e protestës.
Ndryshe, në muajin dhjetor të vitit të kaluar studentët nisën protestat masive para Ministrisë që zgjatën deri në muajin shkurt. Ata kërkuan tarifa më të ulëta si dhe përmirësimin e kushteve në universitete.
Më 9 Janar Këshillat Studentore për Universitetin përmes një Platforme iu drejtuan Kuvendit, Kryeministrit Edi Rama, Ministres së Arsimit, Besa Shahini dhe Universiteteve Publike.
Kërkesat e studentëve
1.Rritja e buxhetit të arsimit në 5% të GDP, me qëllim mundësimin e përgjysmimit të tarifës së studimit për çdo nivel studimi, përmirësimin e infrastrukturës dhe mësimdhënies (universitete dhe konvikte).
2.Transparencë me buxhetin nga Ministria e Arsimit dhe IAL-ve, publikimi të gjitha shpenzimeve online.
3.Rritja nga 10% në 50% e peshës totale të votës së studentëve për të zgjedhur kandidatët për dekanë, rektorë dhe çdo fakultet të ketë një përfaqësues të studentëve në senatin akademik.
4.Rishikimi i titujve akademikë dhe verifikimi i teksteve mësimore.
5.Mbështetur në nenin 99 mbi Këshillat Studentore, ligji i arsimit të lartë, pika 2 kërkojmë që bordi i administrimit të IAL-eve të ketë numër të barabartë votash si nga MAS dhe IAL-t si edhe të shtohet një përfaqësues në këtë bord nga studentët.
6.Pajisja e të gjithë studentëve me kartën e studentit brenda vitit akademik 2018 – 2019.
7.Ndërtimi i bibliotekave me standarte Europiane dhe me libër universitar online, falas për studentët në gjuhën shqipe.
8.Vlerësimi i performancës në mësimdhënie dhe kërkim shkencor i pedagogut, publikimi i tij online dhe regjistrimi i leksioneve.
9.Të zbatohen ligjet për individët: “Për statusin e të verbrit”, “Për statusin e jetimit”, “Për statusin e invalidit paraplegjik dhe tetraplegjik” etj. Të cilët duhet të kenë lehtësira për pagesën e tarifës vjetore.
10.Te pyeten dhe të konsultohet me student të cilet kanë këtë status për çdo moszbatim të ligjit dhe ndryshime të tij. 11.Të merren në konsiderate çdo sygjerim i studentëve me statusin, “Për statusin e të verbrit”, “Për statusin e jetimit”, “Për statusin e invalidit paraplegjik dhe tetraplegjik” etj.
