Paligjshmëria te karburantet, Braçe: Paguani detyrimet, mos i bini telefonit…

Deri sa aksioni antiinformalitet vazdhon ndërkohë janë konstatuar shkelje të rënda në tregun e karburanteve, Zv/kryeministri, Erion Braçe, tha sot se diferenca e litrave të shitura dhe atyre të padeklaruara shkon në mijëra ton. Duke u shprehur i vendosur në zbatimin e ligjit për të goditur rastet abuzive, ai u bëri thirrje subjekteve të zbatojnë ligjin, të shmangin abuzimet, të paguajnë detyrimet dhe mos t’i bien telefonit, pasi sipas tij, ligji do të veprojë njësojë për të gjithë.

“Në tregun e karburanteve vazhdon të gëlojë paligjshmëri në aspektin fiskal. Administrata ka zbuluar shkelje të rënda ligjore në regjimin e kasave. Në tregun e karburanteve ka evazion fiskal, dhe diferencat e litrave shkojnë në mijëra ton. Grupet e përbashkëta po verifikojnë çdo pompë. Dua të mbështes prokurorët në Elbasan dhe në Tiranë. Hetimet e tyre janë të rëndësishme për t’i dhënë fund kësaj vjedhjeje.  Paguani detyrimet fiskale dhe borxhet, sepse nuk do të shpëtoni së paguari nga detyrimet tuaja.  Ne kërkojmë vetëm kuptonin tatimor dhe asgjë më shumë, kjo të jetë konform rregullave. Ne duam që ata të punojnë ligjërisht, të fitojnë ligjërisht dhe të paguajnë detyrimet ligjore e fiskale.“

Zv/kryeministri Erion Braçe edhe një herë u shpreh i vendosur në zbatimin e ligjit për të goditur rastet abuzive, subjektet duhet të paguajnë detyrimet dhe mos t’i bien telefonit, pasi sipas tij, ligji është i barabartë dhe do të veprojë njësojë për të gjithë ndonëse Beso o Taiwanit doli më i mbrojtur se ariu, tatimorët e mbyllën gjykata e hapi!

“Mos të shkruajnë as në telefonin tim dhe as në rrjetet sociale, sepse nuk më bën përshtypje  fare. Kush shan, merr mbrapsht atë që meriton,” tha Zv/kryeministri Erion Braçe duke shprehur mbështetjen politike të gjithë trupës sonë tatimore, Policisë së Shtetit,  Inspektoriatit  dhe AKU të ndodhura prej ditësh në territor, përfshirë edhe në orët e vona për të vënë sigurinë dhe ligjin në secilin treg.