Pallatet e dëmtuara nga tërmeti, Edi Rama: Ata që i ndërtuan ose do i riparojnë ose do shkojnë ne burg!

Pritshmëria qytetare ishte e madhe në veçanti e atyre që janë prekur nga tërmeti tragjik i 26 Nëntorit, por Komitetit Kombëtar të Rindërtimit nuk rezultoi asgjë më shumë se sa një flluskë sapuni, ku për fat të keq korit të Kryeministrit Edi Rama iu bashkangjitën edhe njerëz që deri dje ishin shumë aktiv edhe pa dorën e qeverisë.

Përveç ekspertëve, pjesë e këtij Komiteti u pa se ishin humanist të këtij kombi por shqiptarët e kuptuan pikërisht nga ky institucion i shpikur nga Kryeministri se për të padëgjueshmit është rezervuar burgu.

Oferta e parë nga Kryeministri ishte Amnistia për ato raste ku pallatet janë dëmtuar, jo si pasojë  e lëkundjeve të forta të tërmetit, por për shkak të gabimeve në realizim. Ato, tha Edi Rama, do të duhet të riparohen nga ata që i kanë ndërtuar dhe ka jo pak ndërtesa që janë në këtë kategori, ndërsa paralajmëroi se ata që nuk do t’i rikuperojnë, do të shkojnë në burg.

“Pallatet e dëmtuara, që mund të riparohen, do të riparohen nga ata që i kanë ndërtuar. O do ti riparojnë vetë ose do shkojnë në burg, se nuk ka mundësi që të riparojmë pallate të cilat kanë shfaqur dëme të rikuperueshëm sepse janë bërë gabime në realizim në zbatim. Edhe në këtë kategori ka jo pak pallate. Të vijën ata që i kanë bërë dhe t’i riparojnë, ato që janë të riparueshëm,” tha Kryeministri Edi Rama ndërsa kishte një paralajmërim edhe për ndërtuesit që shkelin lejet.

Ndërtuesit dhe arkitektët në burg…

Ndonëse kishte në krah një imam si Elvis Naçi që deri sot njihej si një humanist i rrallë, Kryeministri Edi Rama në Komitetin Kombëtar të Rindërtimit kërcënuesit ndërtuesit të cilët shkelin lejet edhe pse në raste të rralla këto shkelje nuk janë ligjëruar deri më sot pikërisht nga i pari i Bashkisë, e që në rastin e Tiranës ndërtuesit e bënë në tri mandate me Edi Ramën.

Ndërtuesit dhe arkitektët, që Edi Rama i quajti gardianë, do të përfundojnë në burg deri në 15 vjet burg nëse nuk i respektojnë lejet. I bindur se kjo do të ndodhë, Rama tha se deri më sot kjo ka qenë beteja e tij e humbur, për disa vite me radhë.

“Ndërtuesit që shkelin lejen e ndërtimit do të shkojnë në burg. Kur e ke lejen për 8 kate dhe i thonë hajde ma bëj 12, ata duhet të denoncojnë. Ata janë gardiani. Nuk mendohet që arkitekti të shkojë jashtë asaj që është vepra e tij. Duhet të ketë përgjegjësi individuale dhe të ketë pasoja penale dhe financiare. Gjitha jeta ka qenë kështu. Kjo ka qenë beteja ime e humbur, e kam humbur me shoqatat, me parlamentin kur isha kryetar bashkie”, u shpreh Rama.

Përgatituni për një dëm mbi 500 mln euro

Inxhinieri Arben Meçe, i pranishëm në mbledhjen e  Komitetit Kombëtar të Rindërtimit, ishte i prerë lidhur me dëmet e shkaktuar nga tërmeti dhe përgjegjësitë e qeverisë që do t’i duhet të mbajë.

“Zoti kryeministër përgatituni për një dëm mbi 500 mln euro. Edhe 10 mln, edhe 20 mln, 100 mln është hiç përpara dëmit që do të përballojë Shqipëria. Çka do të thotë mobilizimi i kësaj sasie kërkon organizim dhe vëmendja jonë kryesore është të organizohemi që në mënyrë kapilare të zbresin deri tek qytetari. Mund të diskutojmë legjislacion tani, nuk është koha për legjislacion. Po ka defekte. Mund të diskutojmë kushtet teknike.  Po jua them unë defektet, jua them edhe ku janë defektet,” tha Meçe duke përsëritur se jemi në kushtet e gjendjes së jashtëzakonshme:

“Kjo do të thotë mobilizim, nuk ka vullnetare tani. Unë i jam përgjigjur mobilizimit që më mbështeti. Sot nuk ka diskutim për transparencë investimesh, ajo është e padiskutueshme. Nuk duhet ta diskutojmë kurrë. Ajo duhet të jetë e centralizuar dhe të gjithë kemi një gjeneral. Nuk e di kush është, sot kemi ardhur me një letër. Unë duhet të isha në punë. Unë dua detyrën zoti gjeneral, me jep detyrën sepse për atë kam ardhur. Nuk kam ardhur për të treguar sa i ndershëm jam. Sot duhet të nisim punën. Nuk duhet të humbasim asnjë sekondë. Me jep detyrën sepse për atë kam ardhur.”

Ndërsa të tjerët armën më të fortë e kishin fjalën, Inxhinieri Arben Meçe kërkonte punë ndërsa i bëri të qartë se koha për zgjidhjen e problemit do të jetë e gjatë:

“Koha e zgjidhjes së problemit do të jetë e gjatë. Durrësi është një katastrofë sa i përket dëmit që ka. Unë e kam theksuar, të dallojmë dëmin nga shkatërrimi. Sistemi ynë ndërtimor përballoi me sukses një nga goditjet më serioze që ka marrë Shqipëria deri më sot, por duhet të jemi të vërtetë që aty ka defekt të themi po, ka defekt dhe duhet të jemi  prezent me grupet tona të ekspertizës.”