Palmer në Beograd: Të respektohet rezultati i zgjedhjeve në Kosovë
Përfaqësuesi Special i Departamentit amerikan të Shtetit për Ballkanin Perëndimor, Matthew Palmer, tha pas takimit me Presidentin e Serbisë, Aleksandar Vuçiç në Beograd se është e rëndësishme që rezultati i zgjedhjeve në Kosovë të respektohet.
Me këtë rast, ai tha se subjekti politik Lista Srpska ka marrë mbështetjen e shumicës së serbëve të Kosovës në zgjedhjet e 6 tetorit, raporton RFE, dhe se me këtë e ka fituar të drejtën për t’u përfaqësuar në Qeverinë e Kosovës.
“Unë mendoj se në Kosovë ka vend për shumë zëra të ndryshëm që duhen dëgjuar, por është gjithashtu e rëndësishme të respektohen rezultatet e zgjedhjeve,” tha Matthew Palmer.
Nga ana tjetë presidenti i Serbisë, Aleksandar Vuçiç, tha se ishte i kënaqur me përmbajtjen e takimit, por nuk zbuloi shumë detaje.
Lidhur me dialogun Kosovë-Serbi, i cili është ndërprerë që nga nëntori i vitit të kaluar, Vuçiç tha se pret që shumë shpejt, brenda dy ose tre muajsh, ai të vazhdojë.
“Ne duam që dialogu të jetë serioz dhe të çojë në një zgjidhje kompromisi. Serbia është e gatshme për një kompromis, por nuk është dhe nuk do të jetë kurrë e gatshme të poshtërojë veten dhe njerëzit e saj. Asnjëherë nuk kemi bërë ndonjë kërkesë ekstreme, as nuk kemi kërkuar diçka për të cilën ne e dimë që askush nuk do ta pranojë, kjo është arsyeja pse përmendëm një kompromis”, tha Vuçiç duke shtuar se gabojnë edhe ata shqiptarë dhe një pjesë e bashkësisë ndërkombëtare të cilët mendojnë se përmes presionit do ta detyrojnë Serbinë të pranojë diçka në kundërshtim me interesat e saja kombëtare.
Duke folur për raportet ndërmjet Serbisë dhe Shteteve të Bashkuara, Vuçiç tha se dëshiron që ato të intensifikohen, përderisa përsëriti ftesën për presidentin amerikan, Donald Trump, që ta vizitojë Serbinë.
“Shfrytëzoj rastin që edhe njëherë të ftoj presidentin Donald Trump të vizitojë Serbinë. Asnjë president amerikan, që nga Jimmy Carter më 1980 nuk e ka vizituar Serbinë. Kjo vizitë do të ishte shtysë e fuqishme për zhvillimin e marrëdhënieve tona,” tha Aleksandar Vuçiç.
Ndryshe, Përfaqësuesi Special i Departamentit amerikan të Shtetit për Ballkanin Perëndimor, Matthew Palmer vizitoi Beogradin pas Shkupit dhe Prishtinës, ku u takua me krerët më të lartë shtetëror.
