Palmer njeh 30 Qershorin, reagon Presidenti…
Pas deklaratës së Zv/Nd.Sekretarit të SHBA, Mathew Palmer, se pret që zgjedhjet në Shqipëri do të zhvillohen më 30 qershor, Presidenca reagon me një vlerësi i cili vetëm me Mathew Palmer dhe përmendet qëndrimi i Kryetarit të Komisionit të Politikës së Jashtme të Kongresit Amerikan, Eliot Engel:
“Presidenti i Republikës Sh.T.Z Ilir Meta vlerëson deklaratën e përgjegjshme, të vëmendshme e njëkohësisht shqetësuese të Kryetarit të Komisionit të Politikës së Jashtme të Kongresit Amerikan, Eliot Engel, këtij miku të sprovuar të Shqipërisë, Kosovës dhe shqiptarëve, mbi situatën e vështirë politike në Shqipëri dhe mbi rëndësinë imediate të rivendosjes së dialogut dhe shtetit të së drejtës,” thekson Zëdhënësi i Presidentit, Tedi Blushi duke shtuar:
“Presidenti i Republikës siguron Kryetarin e Komisionit të Jashtëm të Kongresit Amerikan, z.Eliot Engel dhe të gjithë miqtë e vërtetë të Shqipërisë në Shtetet e Bashkuara të Amerikës, se po bën dhe do të bëjë të gjitha përpjekjet që Shqipëria të mund të organizojë zgjedhje vendore gjithëpërfshirëse, demokratike, me standarde, të lira dhe të ndershme, ashtu siç e meriton një vend i NATO-s dhe një vend që dëshiron të bëhet anëtar i Bashkimit Europian.”
Ndryshe, Kongresmeni amerikan Eliot Engel, Kryetar i Komisionit të Jashtëm të Dhomës së Përfaqësuesve, u bëri thirrje të gjitha palëve të qëndrojnë larg konfrontimit, të tregojnë përmbajtje maksimale dhe të ndalojnë të gjitha aktet e dhunës.
Duke shprehur shqetësim për gjendjen e tensionuar në Shqipëri, ku siç tha ai, udhëheqësit politikë duket se kanë arritur një rrugë pa krye, “Kjo mosmarrëveshje, thotë Engel, mund të zgjidhet vetëm me dialog dhe në bazë të sundimit të ligjit.”
“Shqipëria, është anëtare e NATO-s dhe meriton një të ardhme evropiane, por krizat e përsëritura rreth zgjedhjeve e minojnë ecjen e saj përpara,” thekson Kryetari i Komisionit të Jashtëm të Dhomës së Përfaqësuesve.
