Panairi i 28-të i Librit, Artan Fuga merr çmimin “Autori më i mirë i vitit”
“Autori më i mirë i vitit” i Panairit të 28-të të Librit është Artan Fuga, çmim ky për romanin “Ndëshkimi i dytë i Evës”, një strukturë romaneske, ku ndërthuren miti i zanafillës, dramat e jetës familjare e urbane dhe zhvillimet teknologjike të bashkëkohësisë.
Çmimi për “Përkthimin më të mirë” iu dha Virgjil Muçit për përkthimin e veprës Xhejmsi të Percival Everett, fitues i Çmimit Pulitzer 2025.
Për përkthimin më të mirë letrar nga frëngjishtja në shqip iu dha Urim Nergutit për përkthimin e romanit “Hyrija” të Kamel Daoud, fitues i çmimit Goncourt 2024.
Çmimin “Autori i librit më të mirë studimor”, e fitoi Ali Xhiku për veprën Faqeve të historiografisë shqiptare. Çmimi u mor nga botuesi i veprës Bujar Hudhri.
“Autori i librit më të mirë për fëmijë” i është dhënë Valbona Banka për romanin për fëmijë Aria.
Panairi i 28-të i Librit ndau edhe dy diploma mirënjohjeje, e para nga Ambasada e Bullgarisë për përkthyesen Janka Trifonova Selimi, e cila u mor nga e bija Melina Selimi. Ndërsa diploma e dytë e mirënjohjes u dha nga Ambasada e Polonisë për profesorin Arqile Teta.
Ndryshe, në Pallatin e Kongreseve në Tiranë nesër përmbyllet edicioni i 28-të i Panairit të Librit, ku nga 16 Nëntori, rreth 100 shtëpi botuese nga Shqipëria, Kosova dhe Maqedonia e Veriut prezantuan tituj të rinj, përkthime, botime akademike dhe literaturë për fëmijë.
