Panairi i Energjisë, Shqipëria do të rishikojë strategjinë dhe do të përshtatet me zhvillimet

Sot u çel në Expocity, Edicioni i 4-t i Panairit dhe Forumit Ndërkombëtar të Energjisë.

Biznese, institucione publike të sektorit, si dhe palë të tjera të interesuara, patën mundësinë që në ditën e parë të këtij eventi të ndajnë zhvillimet, risitë dhe pikëpamjet e tyre mbi një sektor, i cili është përfshirë nga një dinamikë e gjerë zhvillimesh në dy vitet e fundit.

Në fjalën e tij, zëvendësministri i Infrastrukturës dhe Energjisë, Ilir Bejtja, tha se sektori i energjisë është bërë i paqëndrueshëm si për sa i takon çmimeve edhe sigurisë së furnizimit, çka parashtron sfida edhe për Shqipërinë, teksa për bizneset kjo mund të përbëjnë një mundësi pasi kthimi i investimit është shumë më i shpejtë.

“Tregjet e energjisë kanë humbur qëndrueshmërinë në çmime dhe siguri furnizimi. Çmimet kanë arritur nivele të çmendura, duke i bërë tashmë edhe investimet më të leverdishme dhe ndaj dua të ftoj bizneset që të shfrytëzojnë këtë mundësi.

Nga ana tjetër duhet që të punojmë jo vetëm për rritjen e kapaciteteve prodhuese por edhe kursimin duke kombinuar këtu edhe eficiencës. Shqipëria është një konsumator i madh energjie, për shkak të automatizimit të ulët të ekonomisë dhe ndryshimi i kësaj pikëpamje do të ketë ndikime pozitive.

Duhet të eksplorojmë zhvillimet e reja në sektor siç janë kombinimi i fotovoltaikut me bujqësinë apo peshkimin. Po kështu duhet të rishikojmë strategjinë e energjisë. Nuk është normale të rishikohet një dokument kaq i rëndësishëm në kaq pak kohë por zhvillimet dinamike të sektorit dhe risitë e tij që rrisin mundësitë duhet të reflektohen” tha Bejtja.

Agim Shahini, nga Aleanca Kosovare e Biznesev,e tha se Shqipëria dhe Kosova kanë kapacitete të disponueshme për të zhvilluar më tej sektorin e energjisë. Dy vendet, sipas tij, sipas modelit që kanë ndërtuar ndër vite mund të mbështeten tek njëri-tjetri.

“Shqipëria ka më shumë prodhim në dimër e ne kemi më shumë prodhim në verë. Falë autostradës energjetike që kemi ngritur mund të ndihmojmë njëri-tjetrin dhe të rrisim këtë shkëmbim në vazhdim. Këto shkëmbime duhet të rriten në çdo aspekt mes dy vendeve pasi me keqardhje konstatoj se me Serbinë Kosova ka më shumë Shkëmbime sesa me Shqipërinë” tha Shahini.

Pjesë e forumeve të energjisë ishin disa nga problematikat më të ndjeshme të sektorit si lidhjet në rrjet të fotovoltaikëve, zgjidhjet më të përshtatshme për vetëprodhuesit, skema e matjes neto dhe sa e përshtatshme është ajo për vendin.

Panairi dhe Forumi Ndërkombëtar të Energjisë, i organizuar nga Expocity Albania, do të qëndrojë i hapur edhe nesër, 29 qershor 2022, duke vënë fokusin te zgjidhjet smart të sektorit, mundësitë më të mira teknologjike të investimit në sektor dhe modele të zbatuara dhe histori suksesi./Monitor/