Panairi i Librit 2021, Virgjil Muçi shpallet autori më i mirë

Pas vlerësimit të mbi 100 prurjeve të reja në letërsinë shqiptare gjatë këtij viti, juria vendosi që autorin më të mirë shqiptar të vitit 2021 ta shpall shkrimtarin Virgjil Muçi me vëllimin me tregime “Fajin ma ka gjuha” ndërsa çmimi i përkthimit më të mirë për këtë vit iu nda Flavia Kabas, me përkthimin e vëllimit me tregime “Qyteti i avullit” nga Carlos Ruiz Zafon.

Pasi u shpall shkrimtari më i mirë i vitit në këtë edicion të veçantë të Panairit të Librit, Virgjil Muçi, nuk ka fshehur emocionet si për çmimin ashtu dhe për vlerësimin nga ana e Kryetarit të Bashkisë Tiranë, Erion Veliaj. Autori i më shumë se 10 librave dhe përkthyes i 13 titujve të autorëve të mëdhenj, tha se kjo është hera e parë që merr çmim nga një politikan dhe për këtë e falenderoi kryebashkiakun Erion Veliaj, të cilin vlerësoi se ka bërë shumë për promovimin e kulturës në qytetin e Tiranës.

Vëllimi me tregime “Fajin ma ka gjuha”, i shkrimtarit Virgjil Muçi, është pjesë e një trilogjie narrative që zë fill me “Përralla shqiptare 100+1 natë”, vijon me “Erotikoni e Satirikoni” dhe përmbyllet me “Fajin ma ka gjuha”. Libri “Fajin ma ka gjuha” përmban 14 tregime dhe 1 novelë.