Panairi i Librit, DPA prezanton gjashtë botime të reja studimore

Drejtoria e Përgjithshme e Arkivave, DPA, ka prezantuar sot në Panairin e 25-të të Librit “Tirana 2022”, gjashtë botimet të reja studimore, që trajtojnë tematika historike dhe të lëmit të arkivistikës.

Në fjalën e tij, Drejtori i Përgjithshëm i DPA, Prof.Asoc.Dr. Ardit Bido, tha se kemi të bëjmë me një rikthim të DPA-së në funksionin e botueses pas një periudhe të gjatë mungese, duke shtuar se duke nisur nga ky vit, botimet do të jenë periodike.

“Falenderoj të pranishmit dhe profesorët e nderuar, të cilët janë pjesë jona e pandashme. Pas një munguese të gjatë, i rikthehemi botimeve dhe kemi vendosur që të ketë 5 botime të përvitshme dhe cilësore në fushën e historiografisë. Botimet që prezantojmë sot trajtojnë përvjetorë të rëndësishëm të një game të gjerë, të personaliteteve apo të ngjarjeve historike. Falenderoj anëtarët e Këshillit të Lartë të Arkivave , KLA, që kanë qenë në pararojë për të garantuar cilësinë e produktit final.

Po ashtu, sjellim numrin e radhës të revistës ‘Arkivat Shqiptare’, që përmbledh punimet periodike të studiuesve dhe të arkivistëve në mbarë trojet shqiptare, të realizuara në Konferencat Mbarëkombëtare të Arkivistikës.” tha Ardit Bido.

Pesë prej punimeve të publikuara rishtas vijnë në trajtën e studimeve të kryera nga hulumtues të periudhave të rëndësishme apo të figurave me kontribut në historinë e vendit:

“Misionet aleate në Shqipëri gjatë Luftës së Dytë Botërore 1943-1944”, “Kongresi i Beratit dhe Autoqefalia e Kishës Ortodokse Shqiptare”, “Justin Godarti përmes dokumenteve arkivore”, “Marrëdhëniet e ish-Partisë së Punës së Shqipërisë me partitë komuniste dhe lëvizjet marksiste-leniniste jashtë ‘Bllokut komunist’” dhe “100-vjetori i themelimit të Muzeut Kombëtar, 1922-2022”.

Ndryshe, këto punime janë realizuar nga bashkëautorët Dr. Endrit Musaj dhe Dr. Lorenc Agalliu, Prof.Asoc.Dr. Ardit Bido dhe Myrteza Sharra, Gjergj Totozani, Armando Boçe dhe Arbër Bilbili, Elsa Saka dhe Dr. Dorian Koçi ndërsa për të gjashtin vit radhazi, bashkëpunimi mes DPA dhe Agjencisë Shtetërore të Arkivave të Kosovës, ASHAK, kurorëzohet me botimin e numrit të radhës së revistës “Arkivat Shqiptare”.

Me këtë rast, Kryeshefi i ASHAK, Mr.Sc.Bedri Zyberaj, vlerësoi bashkëpunimin me DPA-në dhe tha se synimi i kësaj reviste është të bëjë bashkë hulumtuesit për të shqyrtuar çdo vit ngjarje historike, si edhe problematika apo prakika të përbashkëta të dy institucioneve arkivore.

Botimet e prezantuara së fundmi, të gjashtë numrat e revistës arkivore dhe të tjera publikime të mëparshme me tematika të rëndësishme historike, do të gjenden në stendën e Akademisë së Shkencave të Shqipërisë , në Panairin e 25-të të Librit “Tirana 2022”.