Pandëshkueshmëria, Rama: Koka e korrupsionit në Shqipëri s’janë politikanët!

Kryeministri Edi Rama vazhdon të jetë i bindur dhe këtë e përsëriti edhe sot në Konferencën e Lartë Antikorrupsion se koka e korrupsionit në Shqipëri nuk janë politikanët por korporata e gjykatësve dhe prokurorëve që kanë krijuar pandëshkueshmërinë në sistem. Ndonëse prokrurët dhe gjykatësit i emëron politika, Edi Rama tha edhe ambasadorëve Yuri Kim dhe Lugi Soreca se po të mos kishin qenë këta nuk do kishin qenë as korrupsioni spektakolar dhe nganjëherë dhe vrastar i politikanëve. Premisa për dënimin e gjyqtarëve dhe prokurorëve të korruptuar nga SPAK, tha Rama, është ajo që presin shqiptarët.

“Kjo është premise e cila SPAK-un do ta bëjë institucionin që të gjithë kemi shpresuar dhe mbi të gjitha shqiptarët kanë shpresuar. Përndryshe SPAK-u do të jetë zhgënjimi më i madh ndaj shqiptarëve tek reforma në drejtësi. Do të jetë goditja më e madhe morale që do i bëhet popullit shqiptar pas gjithë kësaj mbështetjeje që i dha reformës në drejtësi dhe zhgënjimi i madh i partnerëve të Shqipërisë. SPAK-u ka misionin të pastrojë deri në fund, ata që vetting i pastron thjesht dhe vetëm nga sistemi. Tema këtu dhe beteja këtu është beteja për ta filluar tamam nga koka dhe koka e korrupsionit në Shqipëri nuk janë politikanët,” tha Edi Rama duke shtuar se nuk ishin politikanët pavarësisht se kanë qenë pjesë.

“Koka kanë qenë korporata e këtyre gjykatësve dhe prokurorët që kanë krijuar pandëshkueshmërinë në sistem. Po të mos kishin qenë këta nuk do kishin qenë as korrupsioni spektakolar dhe nganjëherë dhe vrastar i politikanëve dhe nëse nuk vendoset në themel të sistemit të drejtësisë kurbani i korrupsionit 30-vjeçar që është fiks tek korporata që vetting po e shpërbën por nuk mjafton atëherë ngrehina nuk do qëndrojë dhe historia do përsëritet keq. Unë kam besim që nuk ka asnjë rrugë tjetër dhe që do të ndodhë kështu por ajo që është e rëndësishme që kështu të ndodhë më herët se sa vonë. Shqiptarët janë investuar tek vetting me gjithë shpresat e tyre.

Sot kanë një zhgënjim sepse mendoj nuk e kanë kuptuar deri në fund që vetting pastron sistemin por nuk bën ndëshkimin e atyre që pastron. këtë duhet ta bëjë sistemi. për këtë është SPAK, BKH, institucionet e reja. Bashkëjetesa paqësore mes sistemit të ri dhe peshkaqenëve absurd që vazhdojnë të lundrojnë në formë avokatësh, konsulentësh, deputetësh, politikanësh do të ishte fundi i gjithë përpjekjes. Sloganet, parullat, rekomandimet me luftëra që gjithmonë e hedhin llafin tek politikanët duhet të mbarojnë. Asnjë shoqëri nuk përfiton nga diskriminimi në bllok i përfaqësuesve të vet. Duhet të ndahen gjërat nga drejtësia.”

Por Kryeministri Edi Rama tha edhe me rastin e prezantimit të rezultateve të Raportit të Grupit të Shteteve Kundër Korrupsionit, GRECO, për Shqipërinë, se askush nuk duhet të krijojë iluzione pasi nëse nuk goditet korrupsioni i nivelit të lartë brenda sistemit të drejtësisë, nuk mund të mendohet se kjo do të vlejë dhe për zyrtarët e lartë.

“Më vjen mirë që këtu flasim për korrupsionin bazuar në fakte. Në fakte të nxjerra në pah në mënyrë krejt të pavarur nga një organizatë e mirënjohur për integritetin për identifikimin e korrupsionit në të gjitha shtetet dhe vlerësimin e situatës. Padiskutuar që lufta ndaj korrupsionit është në thelb luftë për modernizimin e shtetit. Është alternativa e shtetit kur ai mungon në shërbim ndaj qytetarëve, kur është i padisponueshëm për të dhënë atë që secilit i takon. Dhe kur shteti është i pafuqishëm për të vendosur interesin publik mbi interesa të ndryshme private.”

Lojët e fjalëve me sistemi, Kryeministri i përdori edhe me këtë rast duke theksuar se dallimi mes vendeve të zhvilluara dhe vendeve në zhvillim në aspektin e korrupsionit, s’është dallim mes popujve, gjenetik, por është dallim sistemi.

“Vendet e zhvilluara s’janë imune ndaj vendeve të korrupsionit. Pasi ai është si djalli që fle tek i gjalli. Është pjesë e jetës njerëzore. S’janë njerëzit që korruptojnë sistemin, por sistemi njerëzit. Shqipëria është ende në një proces rritjeje, ende një shtet demokrat shumë i ri. Janë shumë në jetën e një njeriu, 30 vite në procesin e shtet-ndërtimit. Reforma në drejtësi është një moment kyç. E tërë kjo është një garanci për të ardhmen e fëmijëve tanë. Këtu nis e ardhmja e një shteti tjetër, që nesër do të jetë imun. nëse shohim sot panoramën e aktualitetit në drejtësi, ajo është dinamike dhe ka shumë të bardhë e shumë të zezë. E bardha është theksuar dhe e zeza është theksuar.

Ka shumë shpresë dhe shumë arsye për trishtim. E bardha do të shkojë drejt zgjerimit, e zeza drejt zvogëlimit. Ndërkohë është e domosdoshme të vendoset theksoi sipas mese teksa vettingu bën kërdinë e duhur mbi të gjithë gjërat e akumuluara ndër vite. Askush mos të ketë asnjë iluzion, s’do të ketë goditje në nivelet e larta, nëse s’do të ketë goditje në nivelet e larta të drejtësisë. S’do të shkojnë pas hekurave, mos të kemi asnjë iluzion se do të ndodh me zyrtarë të lartë. “

Dhe jo vetëm kaq! Edi Rama shkoj edhe më larg duke u shprehur se tani që po fliste, ishte i bindur se gjykatës dhe prokurorë, janë duke bërë ndonjë krim në salla gjyqesh ku jepen vendime katastrofike të përmasave ku nuk kanë ndodhur para vettingut, në cënim të pronës, publike e private, me idenë se nuk e kalojmë vettingun ndërssa shtoi:

“Ndaj është koha të bëjmë gjithçka që ata mos të dalin nga kjo pjesë e jetës me një thes me para. S’do të shkojmë para drejtësisë e s’do bëhemi shembull, atëherë do të jetë e largët dita kur goditja do të ngjitet më lart. Kjo është premisa ku duhet te fokusohet e gjithe.“

Nuk harroi dhe Ligjin Antishpifje duke e konsideruar shpifjen si korrupsionin.

“Ju keni qenë shumë të ndjeshëm për ligjin për shpifjen. Madje të gjithë ata që punojnë në grupin për këtë ligj thonë; “Aman mos e thuaj se është ligj për ‘shpifjen’ se mërziten miqtë tanë ndërkombëtarë”. A thua se ‘shpifja’ është një fjalë që është turp që të përdoret se po na preket ajo virgjëria e fjalës?! Nëse bota dhe Shqipëria s’do të zgjidhin çështjen e shpifjes, fundi i botës do të jetë më i afërt. Ata që kanë qenë më të dëshiruarit për miratuar ligjin për shpifjen kanë qenë sipërmarrësit. Ata kanë qenë më të dëshiruarit, pasi janë të shantazhuar çdo ditë, për të paguar media, që shpifin dhe përhapin panik. Për ushqime, për ilaçe, për jetën e përditshme të njerëzve. Ata i vënë në diskutim dhe i reklamojnë si helme potenciale, se duan paratë e zeza për të ushqyer burimet e tyre të shpifjes.”

Edhe në raport me korrupsionin, Rama vlerëson:

“Shpifja është po kaq e rrezikshme dhe e dëmshme, duke i bërë të gjithë njësoj dhe duke i përcaktuar për interesa korruptive.”

Suedia e Gjermania janë më pak të korrupatuara jo se gjermanët apo suedezët janë më pak të korruptuar, por atje ka një sistem më të mirë. Për ilustrim ai sfidoi të pranishimit se nëse çojnë 40 gjermanë në simbolin e korrupsionit në Shqipëri, Hipotekën e Vlorës, pastaj mund të shikojnë sjelljen e tyre më pas.

“Nuk janë suedezët më të ndershëm se shqiptarët nga genet por nuk e konceptojnë dot si mund të paguash për të marrë shërbime për shkak se sistemi funksionon plotësisht dhe e bën të pamundur ta imagjinosh.

S’janë gjermanët më të ndershëm se shqiptarët gjenetikisht dhe janë të pakorruptueshëm. Sillini 40 gjermanë ti çoj te Hipoteka e Vlorës dhe ti lëmë 40 ditë dhe flasim prapë pastaj sesi do të jetë situata e tyre shpirtërore dhe raportet e tyre me tundimet e profetit që i rezistoi 40 ditë. Duhet të bëjmë sistemet,” tha Edi Rama dhe ndonëse ishte betuar se në prani të ndërkombëtarve nuk e shanë shtetin e tij, ai e bëri edhe publikisht. Madje foli për një praktikë që zbatoi pikërisht partia që ai drejton për punësimin e mësuesve apo infermierve, ashtu si dhe largimin e tyre nga puna.

“Dje dhe sot, korrupsioni nuk ka krahasim. Dje, disa vjet më parë nënkuptoj korrupsioni ishte i gjithë-përhapur. Dje nuk bëheshe dot mësues sipas meritës në Shqipëri. Më parë ose duhet të të mbështeste partia në pushtet, apo të paguaje ose të kishe lidhje magjike farefisnore. Sot kjo nuk ndodh ose nëse ndodh është krejt minimale.

Sot që të bëhesh mësues, duhet të konkurrosh në një platformë dixhitale dhe sipas pikëve që merr, ti hyn ose jo. Dje, infermier nuk bëheshe pa pasur partinë, paranë ose krushqinë. Sot infermierët hyjnë në sistem me platformë dixhitale, ku testohen dhe rankohen sipas meritës. Dje nuk hyje në universitet nëse nuk ishe djali i dikujt me mbiemër të njohur,” tha Edi Rama duke ëndërruar me sy hapur ashtu si dhe për revolucionin me shërbimet  ndaj qytetarëve që janë online.

“Sot po bëhet revolucion për shërbimet dixhitale. Ne së shpejti mund të kemi nivel të shërbimeve online në nivelin 95 për qind. Janë kursyer shërbimet fizike. Mbi 3 milionë dokumente janë dhënë online në Shqipëri. Nuk janë gjermanët më të ndershëm se shqiptarët gjenetikisht, sillini 40 gjermanë t’i çojmë tek Hipoteka e Vlorës. Duhet sistem.”