Papa Françesku, ende në spital, e kaloi natën mirë

Zyra e Shtypit e Vatikanit njofton sot në mëngjes se “Papa ka fjetur mirë dhe po pushon”. Gjendja shëndetësore e Françeskut, siç u pohua mbrëmë, “mbetet kritike”, por pa asnjë krizë të re në frymëmarrje, me një insufiçiencë renale fillestare dhe të lehtë.

“Nata kaloi mirë, Papa fjeti dhe po pushon”. Ky është përditësimi i sotëm nga Zyra e Shtypit e Selisë së Shenjtë, përsa i përket gjendjes shëndetësore të Françeskut, raporton Vatican News.

Në buletinin e mbrëmshëm, 23 shkurt, në ditën e nëntë të shtrimit në spital, u bë e ditur se “gjendja e Atit të Shenjtë vazhdon të jetë kritike”, por që të shtunën mbrëma nuk ka pasur “kriza të mëtejshme në frymëmarrje”.

Vlerat e analizave të gjakut po përmirësohen, megjithëse disa prej tyre “tregojnë për një insufiçiencë renale fillestare [pra, për një dëmtim fillestar të veshkave], të lehtë, aktualisht nën kontroll”, raporton Vatican News duke përfunduar:

“Papa kupton dhe orientohet mirë, vijohet t’i jepet oksigjen, prognoza mbetet e rezervuar, për shkak të kompleksitetit të kuadrit klinik dhe të pritjes së nevojshme që terapitë farmakologjike të japin rezultat”.