Papa Françesku në Abu Dhabi, meshë me 180.000 besimtarë

Autoritetet në Emiratet e Bashkuara Arabe kanë bërë të ditur sot se rreth 180 mijë njerëz kanë marrë pjesë në meshën që Papa Françesku mbajti në Abu Dhabi, meshë kjo e cila për herë të parë u mbajt në Gadishullin Arab.

Këtë e bëri të ditur sot Zëdhënësi i Vatikanit, Alesandro Gjizoti, para se Papa të largohej nga Abu Dhabi duke shtuar se kjo shifër bazohet në vlerësimin e  autoriteteve lokale ndërsa sqaroi se janë përfshirë 135.000 bileta për ulëset në Stadiumin Zayed Sport City, si dhe numrin e madh të besimtarëve përreth stadiumit që kishin ardhur për ta parë Papa Françeskun në momentin kur kaloi me makinën e tij.

Papa Françesku, i cili vizitoi Emiratet e Bashkuara Arabe me ftesë të Princit të Kurorës sheik Mohammed bin Zayed al-Nahyan, ka dënuar luftërat, ndër të cilat ka veçuar atë në Jemen ndërsa ka bërë thirrje për bashkëpunim më të madh në mes të krishterëve dhe muslimanëve.