Papa Françesku pret Kryeministrin e Kosovës Albin Kurti
Papa Françesku priti sot paradite në audiencë, në Vatikan, kryeministrin e Kosovës, Albin Kurti. Gjatë bisedës së përzemërt u fol për situatën në vend, bashkëpunimin ndërmjet dy shteteve, familjen e rolin e saj në shoqëri, për të rinjtë që janë e ardhmja dhe për rëndësinë e dialogut.
U kujtua historia e lashtë e vendit dhe roli i bashkësive fetare, bashkëpunimi që synon promovimin e vlerave etike e shoqërore për përforcimin e vëllazërimit e të takimit, në shërbim të paqes, në gjithë rajonin, raporton Vaticannews.
“Kam ardhur për t’Ju shprehur mirënjohjen dhe dashurinë e popullit të Kosovës për magjisterin Tuaj të lartë shpirtëror e moral, për kujdesin e vëmendshëm ndaj vendit dhe realitetit ndërkombëtar”, tha kryeministri Kurti. Më pas, kujtoi lashtësinë e krishterimit në Kosovë dhe figurën madhore të shenjtes Nënë Terezë, e cila pikërisht në shenjtëroren e Zojës së Madhe në Letnicë, dëgjoi për herë të parë thirrjen e Zotit në jetën e përkushtuar rregulltare.
Ajo është shembull e frymëzim për të gjithë ne, është Nëna jonë, tha Kurti dhe e njoftoi Atin e Shenjtë për përpjekjet demokratike të vendit dhe kujdesin e qeverisë, ndaj “nënave lehona dhe fëmijëve deri në moshën 16 vjeç, si politikë mbështetëse për ta”.
Gjatë takimit u përmend roli pozitiv i Kishës Katolike në mbështetjen e qytetarëve dhe në ndërtimin e shoqërisë, si edhe u nënvizua rëndësia e dialogut ndëretnik e ndërfetar në Kosovë. Një temë e veçantë, që Papa e ka veçanërisht për zemër, ishte ajo e familjes dhe e të rinjve, që janë e ardhmja. Kryeministri Kurti i kërkoi Papës Françesku që Selia e Shenjtë ta njohë Kosovën dhe e ftoi për një vizitë në vend.
Pas audiencës me Atin e Shenjtë Françesku, raporton Vaticannews, kryeministri Kurti u takua edhe me Sekretarin e Shtetit të Vatikanit, kardinalin Pietro Parolin.
Ndryshe, në delegacionin e kryeministrit bënin pjesë Ministrja e Industrisë, Ndërmarrësisë dhe Tregtisë, Rozeta Hajdari, përfaqësuesi i Kosovës pranë Selinë së Shenjtë, Vehbi Miftari, Ambasadorja e Kosovës në Itali, Lendita Haxhitasim, Këshilltarja politike e Ministrisë së Kulturës, Rinisë e Sportit, Nora Arapi Krasniqi, dhe bashkëkryesuesja e Komisionit Shtetëror për hulumtimin, regjistrimin/inventarizimin, vlerësimin dhe dokumentimin e objekteve të trashëgimisë kulturore, Leonora Visoka Weller.
