Papa: me myslimanët, marrëdhënie vëllazërimi dhe respekti të ndërsjellë

Marrëdhëniet ndërmjet Kishës Katolike e myslimanëve ” karakterizohen nga një përkushtim në rritje për dialogun dhe vëllazërimin, favorizuar nga vlerësimi për këta vëllezër dhe motra, të cilët adhurojnë Zotin e vetëm”. Me këto fjalë, Papa Leoni XIV priti në audiencë përfaqësues të Kishave e bashkësive të tjera të krishtera, si edhe ata të feve të tjera.

Marrëdhëniet ndërmjet Kishës Katolike dhe myslimanëve “janë karakterizuar nga një përkushtim në rritje për dialogun dhe vëllazërimin, i favorizuar nga vlerësimi për këta vëllezër dhe motra, të cilët adhurojnë Zotin e vetëm, të gjallë dhe të njëgjëjtë, të mëshirshëm dhe të gjithëpushtetshëm, krijues të qiellit dhe të tokës, që u foli njerëzve”. Me këto fjalë, Papa Leoni XIV priti në audiencë përfaqësues të Kishave dhe të bashkësive të tjera të krishtera, si edhe ata të feve të tjera. “Ky qëndrim i bazuar në respektin e ndërsjellë dhe në lirinë e ndërgjegjes, përfaqëson një bazë të patundur për ndërtimin e urave ndërmjet bashkësive tona”, nënvizoi Ati i Shenjtë Prevost.

Ndër të pranishmit në audiencë, shumë delegacione ekumenike dhe përfaqësues të feve të tjera, që dje, morën pjesë në Meshën e përurimit të papnisë së Leonit XIV. Nga Kisha Ortodokse e Shqipërisë, përshëndetën Atin e Shenjtë, Hirësia e tij Nikolla, Mitropolit i Apolonisë dhe i Fierit dhe At Ignat Todri. Nga Komuniteti Mysliman, i pranishëm kreu i tij Bujar Spahiu dhe përgjegjësi për mediat Ejup Lila. Nga Kryegjyshata Botërore Bektashiane, ndodhej në audiencë Kryegjyshi Baba Edmond Brahimaj, i cili sot paradite u përshëndet me Papën Leoni XIV.

Ndër përfaqësuesit e feve të tjera, eksponentë të bashkësisë hebraike, myslimane, hinduiste, budiste, sikh, zoroastriane e xhainiste.

Kujtojmë se në Meshën e djeshme, nga Shqipëria ishte i pranishëm Presidenti i Republikës, Bajram Begaj, me bashkëshorten, si dhe ministri i jashtëm Igli Hasani. Nga Kosova, mori pjesë Presidentja Vjosa Osmani./vaticannews/