Papa shtrohet në spitalin Gemelli për mjekim të bronkitit

Mëngjesin e sotëm, pas audiencave në Shtëpinë e Shën Martës, Papa Françesku u shtrua në spitalin Agostino Gemelli në Romë për mjekim të bronkitit.

“Sot në mëngjes, në fund të audiencave të ditës, Papa Françesku u shtrua në Poliklinikën Agostino Gemelli, në Romë, për disa analiza të nevojshme diagnostike dhe për të vazhduar mjekimin e bronkitit në një ambient spitalor,” thekson Zyra e Shtypit e Selisë së Shenjtë përmes një njoftimi.

Prej disa ditësh, edhe vetë Papa Fraançseku foli publikisht për problemet e tij shëndetësore, që e penguan të lexojë katekezën e audiencës së përgjithshme, homelitë dhe fjalimet e tjera të përgatitura.

Sot në mëngjes, Ati i Shenjtë Bergoglio e respektoi rendin e takimeve të planifikuara, të gjitha të mbajtura në Shtëpinë e Shën Martës, ku banon e pastaj, u nis për në Poliklinikën, ku janë mjekuar të gjithë Papët e fundit.

Kjo është hera e katërt që Papa Françesku shtrohet në spitalin romak, pas operacionit të planifikuar në qershor 2021 e pastaj, në qershor 2023 për një tjetër ndërhyrje kirurgjikale. Ndërkaq, në mars 2023, u shtrua për disa analiza./vaticannews/