Papritmas vdes gazetari i afërt me Putinin
Vdes edhe një aleat i Presidentit të Rusisë, Vladimir Putin. Vladimir Nikolajeviç Sungorkin, 68 vjeç, ndërroi jetë dje në fshatin Roshçino ndërsa ishte në udhëtim zyrtar.
Sungorkin ishte Redaktor Përgjegjës në gazetën shtetërore ruse “Komsomolskaya Pravda”, e cila raporton se ai kishte vdekur papritmas pas një ankese për marrje fryme gjatë udhëtimit.
“Ndodhi papritmas, nuk kishte kurrfarë paralajmërimi. Ishim në fshatin Roshçino. Ishim duke udhëtuar drejt Habarovskit ku kishim planifikuar të kalonim mbrëmjen, për të vazhduar më pas drejt Moskës. Gjithçka ishte në rregull,” raporton për “Komsomolskaya Pravda” kolegu i tij Leonid Zaharov duke shtuar se ai kishte ndërruar jetë pasi i kishte propozuar grupit të gjejnë një vend të bukur për drekë.
“I ra të fikët. E nxorëm në ajr të pastër por Vladimiri ishte pa vetëdije, asgjë nuk ndihmoi. Mjeku i cili e pa i pari tha se sipas të gjitha gjasave bëhet fjalë për hemoragji cerebrale.”
Vladimir Putin menjëherë ka shpallur ngushëllime për vdekjen e gazetarit, duke theksuar besnikërinë e tij.
“Vdekja e Vladimir Nikolajeviç Sungorkinit është humbje e madhe për gazetarinë vendase, për të gjithë ne. Ishte atdhetar, person i jashtëzakonshëm, kreativ, i talentuar,” tha Putin, transmeton RIA Novosti.
