“Paqja fiskale”, si do funksionojë! Nga tatimi i dakordësuar te falja e borxheve

Një ditë pasi e prezantoi kreu i qeverisë, ministrja e Shtetit për Sipërmarrjen dhe Klimën e Biznesit, Delina Ibrahimaj dha më tepër detaje mbi mënyrën se si do të implementohet “Paqja fiskale” me bizneset.

Në një takim me përfaqësues të bizneseve të sektorit të turizmit në Shëngjin dhe Velipojë, ministrja bëri me dije se kjo nismë synon të mbështesë formalizimin e aktivitetit ekonomik dhe të lehtësojë barrën tatimore për sipërmarrjet që operojnë në vend, duke përfshirë falje detyrimesh, gjobash dhe kamatëvonesash të papaguara deri në 10 vite më parë.

Ministrja tha se një marrëveshje është propozuar për subjektet që operojnë në sektorin e hotelerisë, për shkak të rritjes së ndjeshme të ardhurave nga turizmi, por edhe prezencës së informalitetit në sektor. Në këtë marrëveshje, sipas saj, operatorët bien dakord të deklarojnë zënien e strukturave akomoduese në masën 65 për qind gjatë sezonit të verës dhe 35 për qind gjatë sezonit dimëror.

“Në ditët e para, 600 biznese nënshkruan marrëveshjen me tatimet, ndërsa aktualisht numri ka arritur në mbi 1 mijë. Ata që pranojnë marrëveshjen, përjashtohen nga inspektimet tatimore dhe vendosin vetë shumën e deklaruar bazuar në udhëzimet e administratës tatimore”, – pohoi Ibrahimaj. Ministrja theksoi se në të njëjtën linjë është propozuar të funksionojë edhe “Paqja Fiskale”, që do të shtrihet për të gjitha bizneset në vend, pas marrëveshjes me tatimet dhe përbëhet nga tri komponentë kryesorë.

Falja e borxheve

Për borxhe më të vjetra se 10 vite, do të fshihet detyrimi, interesi dhe kamatëvonesat. Për detyrime nga 5 deri në 10 vite, nëse nga biznesi paguhet 50 për qind e borxhit kryesor, pjesa tjetër fshihet. Për bizneset që nuk mund të paguajnë menjëherë, do të ofrohet mundësia për një marrëveshje 12-mujore dhe përfitimi i faljes deri në 25 për qind të detyrimit. Ndërsa për detyrime nga 1 deri në 5 vite, do të fshihen gjobat dhe kamatëvonesat nëse paguhet detyrimi kryesor.

Marrëveshje me Tatimet

“Tatimet do të llogarisin fitimin neto mesatar të 3 viteve të fundit të biznesit dhe do ta shumëzojnë me një koeficient që reflekton zhvillimet ekonomike në sektorin përkatës. Tatimi mbi këtë shumë do të jetë 15 për qind. Nëse biznesi deklaron fitim më të lartë se ai i propozuari, do të taksohet me vetëm 5 për qind. Marrëveshja me tatimet për tatimfitimin e dakordësuar do të shmangë kontrollet tatimore”, nënvizoi Ibrahimaj.

Me rishikimin i pasqyrave financiare për 5 vitet e fundit, bizneset mund të përmirësojnë bilancet e tyre duke paguar vetëm 5 për qind të shumës për çdo zë të korrigjuar.

“Rishikimi i bilanceve është një nevojë për pjesën më të madhe të bizneseve që përbën edhe komponentin e dytë të ‘Paqes fiskale’. I japin të drejtë çdo biznesi të rregullojë pasqyrat financiare duke mbyllur një kapitull të shkuar dhe të hapë një të ri për të ardhmen. Për të rishikuar çdo zë të bilanceve biznesi do të paguajë vetëm 5% të detyrimit për çdo zë të rishikuar”./Panorama/