Para Gjykatës Kushtetuese, Ali Ahmeti: Mos prekni në palcën e shqiptarëve!
Pas takimit me partnerët e Frontit Evropian dhe Kryesinë, Kryetari i BDI-së, Ali Ahmeti nga çadra e vendosur përpara Gjykatës Kushtetuese, kishte mesazh të qartë për Kryeministrin e Maqedonisë Veriut, Hristijan Mickoski dhe Gjykatën Kushtetuese se nuk guxon të preket palca e shqiptarëve, pasi kjo nuk është në të mirë të askujt.
“Respektoni Marrëveshjen e Ohrit dhe mos cenoni dhe mos prekni në palcën e shqiptarëve sepse nuk është mirë as për ju as për ne. Ky shtet është i përbashkët. Asnjëherë nuk kemi kontestuar as gjuhën e bashkëqytetarëve as historinë e bashkëqytetarëve. Prandaj mos i prekni në palcë shqiptarët sepse edhe durimi ka një fund,” tha Ali Ahmeti ndërsa pritet vendimi i Gjykatës Kushtetuese për gjuha shqipe, për të cilën dhe u ngritë gjithë kjo rrëmujë ligjore nga koalicioni në pushtet.
Me këtë rast, lideri i Frontit Evropian foli dhe për përfaqësuesit e koalicionit Vlen, për siç tha ndryshim të përditshëm të qëndrimeve.
“Sa për këta tanë që brenda një muaji ndërrojnë ditë për ditë qëndrimet. Fillimisht gjuha shqipe nuk ishte zyrtare e tani na u bë zyrtare dhe dalëzotës janë bërë dhe janë trimëruar. E di unë sa trima janë. Aq trimëri kanë sa një mace të rrëzojë enët në kuzhinë. Aq është takati i tyre.”
Ndryshe, Ali Ahmeti në Reçicë të Vogël mbajti një takim me partnerët e Frontit Evropian dhe kryesinë e BDI-së ku u diskutuar për hapat e mëtutjeshëm ndërsa kërkuan garanci që gjuha shqipe nuk do të preket.
