Para Gjykatës Speciale, Krasniqi: Nuk kam kryer ndonjë krim, para, gjatë dhe pas luftës!

Në Dhomat e Specializuara në Hagë kanë përfunduar deklaratat hyrëse të Zyrës së Prokurorit të Specializuar, mbrojtësit të viktimave dhe ekipeve të mbrojtjes të ish-krerëve të Ushtrisë Çlirimtare të Kosovës, me mbrojtjen e sotme të Jakup Krasniqit dhe deklaratës së tij personale!

Avokatja Venkateswari Alagendra në fjalën e saj hyrëse argumentoi se ndaj ish-zëdhënësit të UÇK-së, organi i ndjekjes nuk ka prova që e lidhin atë me ndonjë nga krimet e pretenduara ndërsa vetë Jakup Krasniqi duke iu drejtuar trupit gjykues tha se nuk ka kryer ndonjë krim, as para luftës, gjatë luftës dhe pas luftës ndërsa e cilësoi absurde akuzën se ai dhe ish-krerët e tjerë të UÇK-së, Hashim Thaçi, Kadri Veseli dhe Rexhep Selimi, kanë persekutuar anëtarë të Lidhjes Demokratike të Kosovës.

Avokatja mbrojtëse e Jakup Krasniqit, Venkateswari Alagendra, ka nisur deklaratën e saj hyrëse me konstatimin se Zyra e Prokurorit të Specializuar, ZPS, nuk ka prova që e lidhin klientin e saj me krimet e pretenduara.

“Provat e prokurorisë do të tregojnë rolin e vërtetë të Krasniqit. Ai nuk kishte kompetenca dhe përgjegjësi që kërkon t’i ngarkojë ZPS-ja dhe as aktivitetet e tij nuk mund të lidhen me asnjë krim që pretendohen nga prokuroria,” tha Alagendra duke shtuar se Krasniqi ishte emëruar zëdhënës i UÇK-së në qershor të vitit 1998 dhe të gjithë aktivitetin e tij e ka pasur publik.

“Zëdhënësit nuk përfshihen në çështje operacionale,” tha ajo duke sqaruar se Krasniqi ishte emëruar një prej dy zëvendëskomandantëve të UÇK-së për një periudhë të shkurtër kohore, por ai kishte qenë zëvendëskomandant për mbështetje dhe nuk kishte të bënte me çështje operacionale.

Sa i përket disa dokumenteve që ZPS ka gjetur në shtëpinë e Krasniqit, pas arrestimit të tij, mbrojtja tha se ZPS-ja duhet të vërtetojë autorësinë e tyre.

“Gjetja e këtyre dokumenteve në shtëpinë e tij nuk i bën autentike,” tha Alagendra duke vlerësuar se prokuroria e ka keqinterpretuar rolin e Krasniqit në UÇK dhe gjithë organizimin e kësaj ushtrie.

“Ai nuk ka qenë në një marrëdhënie hierarkike me autorët fizikë të krimeve. Ai nuk kishte aftësi për të kontrolluar në mënyrë efektive ndonjë ushtar.”

Avokatja Venkateswari Alagendra tha se prokuroria ka dështuar ta bëjë lidhjen e krimeve të pretenduara me vendndodhjen fizike të Krasniqit nëpër periudha të ndryshme kohore gjatë vitit 1999 dhe duket sikur prokuroria është bërë pjesë e propagandës kundër UÇK-së.

“Provat do të tregojnë se organizimi i UÇK-së ishte i ndryshëm në vende të ndryshme dhe kohë të ndryshme,” tha ajo duke sqaruar se UÇK asnjëherë nuk ka pasur një hierarki vertikale të komandës.

Avokatja mbrojtëse e Jakup Krasniqit, Venkateswari Alagendra, tha se fakti që prokuroria insiston se në UÇK ka pasur një ndërmarrje të përbashkët kriminale, dhe pretendimi për qëllim të përbashkët kriminal ishte i njohur dhe publik, nuk qëndrojnë.

“Kjo i bie që NATO mbështeti një ndërmarrje kriminale të njohur,” tha avokatja Venkateswari Alagendra duke iu referuar bombardimeve të NATO-s që çuan në fundin e luftës në Kosovë ndërsa përfundoi:

“Zyra e Prokurorit të Specializuar nuk ka asnjë provë të besueshme që e lidh Jakup Krasniqin me asnjë krim, nuk ka prova për qëllime të përbashkëta kriminale”.

Krasniqi: Asnjëherë s’kam qenë i përfshirë në vrasje e burgosje

Ish-Zëdhënësi i Ushtrisë Çlirimtare të Kosovës, Jakup Krasniqi, në fjalën e tij para trupit gjykues, tha se ai urren dhunën, vrasjen e torturat, jo sepse ai ka qenë subjekt i dhunës, por sepse i konsideroj të ulëta.

“Kushdo që më njeh do t’iu thotë, se unë Jakup Krasniqi, asnjëherë nuk kam qenë i përfshirë në asnjë vrasje, burgosje në asnjë formë të presionit ndaj kujtdo qoftë,” tha Krasniqi duk eshtuar se nuk e kupton logjikën e aktakuzës së ngritur ndaj tij, duke shtuar se ndaj popullit tonë është ushtruar dhunë sistematike.

Për Jakup Krasniqin janë absurde akuzat se ai, së bashku me të akuzuarit e tjerë, kanë persekutuar anëtarë të Lidhjes Demokratike të Kosovës, siç pretendon prokuroria.

“Është absurde që të akuzohen për persekutimin e anëtarëve të LDK-së. Unë vetë isha anëtar i LDK-së. Familjarët e mi, bashkëluftëtarët e mi ishin anëtarë të LDK-së. Vetëm një mendje e çoroditur do të mund të mendonte se jam pjesë e persekutimit tim, të familjarëve të mi.”

Para trupit gjykues, Jakup Krasniqi tha se gjatë kohës sa ka qenë zëdhënës i UÇK-së, është përpjekur që përmes deklarimeve të mbajë shpresën te populli për të vazhduar rezistencën.

“Në rolin tim si zëdhënës i UÇK-së jam përpjekur të jap përshtypje se jemi një strukturë e organizuar mirë për të mbajtur shpresë te populli,” tha ai, prandaj “deklaratat e mia duhet të shihen si pjesë e propagandës për të afirmuar luftën tonë çlirimtare”.

Me këtë Jakup Krasniqi tha se përmbajtja e aktakuzës së ngritur ndaj tij, e ka lënduar më shumë sesa dënimet dhe torturat që ka kaluar në burgjet serbe.

“Unë kurrë nuk kam qenë në shërbim të ndonjë politike të krimit. Në jetën time asnjëherë nuk kam kryer ndonjë vepër kriminale, as para luftës, gjatë luftës e as pas luftës. Gjithmonë kam vepruar ndershmërisht për liri dhe bashkim kombëtar, që kanë qenë qëllimet e mia jetësore.”

Në fund të deklaratës së tij, Jakup Krasniqi kishte tri lutje për trupin gjykues: Të mos keqpërdoren mendimet dhe opinionet individuale të pasluftës për kohën e luftës; Shënimet e tij, të cilat kanë pasur për qëllim përshkrimet për librat e tij shkencorë dhe publicistikë, të mos përdoren si dëshmi për veprat penale; Dhe, materialet të mos keqpërdoren nga Zyra e Prokurorit të Specializuar./RFE/