Para Senatit/ Ambasadorja e re e SHBA: Prioritet, zgjidhja e ngërçit politik në Shqipëri!

E emëruara nga Presidenti Donald Trump për Ambasadore në Shqipëri, Yuri Kim sot në një seancë dëgjimore para Komisionit të Jashtëm të Senatit tha se nëse konfirmohet ambasadore, prioritetet e saj kryesore do të jenë, inkurajimi i Shqipërisë për të arritur nivelin 2 përqind në shpenzimet e mbrojtjes deri në vitin 2024, nxitja e liderëve vendor për të zgjidhur ngërçit politike, inkurajimi në zbatimin e Reformës në Drejtësi, Vettingut dhe krijimin e Strukturave të posaçme për luftën kundër korrupsionit dhe krimit të organizuar, SPAK.

“Së pari do të inkurajoj Shqipërinë të vijojë me kursin e qëndrueshëm për të arritur në 2% të investimeve të mbrojtjes deri në vitin 2024, që kështu Shqipëria të jetë edhe më e fuqishme dhe e aftë si aleate” – tha Kim para senatit.

“Së dyti, do të vazhdoja të promovoja zhvillimin demokratik të Shqipërisë. Menjëherë do të shtyja liderët e Shqipërisë për të zgjidhur ngërçin politik aktual në një mënyrë që përforcohej kërkesa e pranimit të Shqipërisë në BE dhe vendi të ketë sukses gjatë mandatit si Kryetar i Zyrës së OSBE-së në vitin 2020,”  tha Yuri Kim.

Përparësi, sipas saj, është ndihma teknike për Shqipërinë në hetimin, ndjekjen dhe ndëshkimin e korrupsionit dhe krimit të organizuar ndërkombëtar. Me këtë rast, Shqipëria, tha diplomatja Kim para senatorëve, ka një emër jo të mirë për krimin e organizuar, për trafikimin e njerëzve, sidomos të grave si dhe të narkotikëve përmes kufijve.

“Më thelbësorja, unë do të forcoj ndihmën diplomatike dhe ndihmat e SHBA për forcimin e sundimit të ligjit dhe luftimin e korrupsionit dhe krimit të organizuar. Shtetet e Bashkuara duhet të vazhdojnë të inkurajojnë Shqipërinë të zbatojë plotësisht reformën në drejtësi, të vazhdojë verifikimin e gjyqtarëve dhe prokurorëve dhe të krijojë SPAK-un dhe BKH-në.

Unë gjithashtu do të dyfishoja angazhimin dhe ndihmën teknike amerikane në hetimin, ndjekjen penale dhe ndëshkimin e korrupsionit dhe krimit të organizuar ndërkombëtar.” 

Duke iu përgjigjur një pyetjeje të senatorëve për ndikimin e mundshëm të Rusisë në rajon, Yuri Kim tha se fatmirësisht, përpjekjet e Rusisë në këtë aspekt nuk kanë patur shumë efekt.

“E kemi për detyrë që t’i mbajmë më afër miq të tillë si Shqipëria në kohë si kjo. Do të ndihmoj shqiptarët të forcojnë institucionet e tyre që të kenë më shumë rezistencë ndaj përpjekjeve ruse dhe Kinës që përpiqet të infiltrojë në ekonominë e tyre. Do të punojmë ngushtë për të zhvilluar kapacitetet si aleat i NATO-s. Luftëtarët e huaj që janë të arrestuar është sfidë e madhe nëse konfirmohem ambasadore do të punoj me qeverinë për të zgjidhur këtë çështje.”

Ndryshe, Yuri Kim është anëtare në stafin e lartë të Shërbimit të Huaj dhe ka shërbyer në Departamentin e Shtetit si Drejtore e Zyrës së Çështjeve të Evropës Jugore.

Më parë, ajo ishte Drejtore e Qendrës për Studimin e Diplomacisë pranë Departamentit të Shtetit, Shefe e Stafit për Zv/Ssekretarin e Shtetit dhe Drejtore e Zyrës për Sigurinë Evropiane dhe Çështjeve Politiko-Ushtarake.

Yuri Kim ishte gjithashtu Asistente Speciale e Ndihmës Sekretarit të Shtetit për Çështjet e Azisë Lindore dhe Paqësorit dhe anëtare e delegacionit të Shteteve të Bashkuara në bisedimet gjashtëpalëshe për t’i dhënë fund programit bërthamor të Koresë së Veriut.

Diplomatja amerikane, Yuri Kim, ka shërbyer si Këshilltare Politike në Ambasadën e Shteteve të Bashkuara në Bagdad dhe në Ankara.