Para takimit në Washington, Vuçiç në Moskë: Putin më këshilloi…

Presidenti i Serbisë, Aleksandar Vuçiç pas takimit me Presidentin e Rusisë, Vladimir Putin, në Moskë tha se është biseduar për të gjitha idetë dhe mënyra e zgjidhjes së problemit të Kosovës.

“Mora këshilla të caktuara dhe analiza të mira nga Presidenti Putin. Kemi biseduar për idetë dhe mënyrat për zgjidhjen e problemit të Kosovës, dhe nëse mund ta them, Putin në një mënyrë të mençur më dha mendimin e tij, para së gjithash, duke respektuar qëndrimet e Serbisë,” tha Vuçiç i bindur se Rusia respekton Serbinë ndërsa në pyetjen e gazetarëve nëse presidenti rus e ka këshilluar se si të veproj në të ardhmen lidhur me çështjen e Kosovës në skenën ndërkombëtare, Presidenti i Serbisë tha se e kishte të rëndësishme që ta dëgjoj qëndrimin e Putinit lidhur me çështjen e Kosovës.

“Putin është shumë i mençur dhe i madh, që të bëjë diçka në mënyrë të drejtëpërdrejtë, por në mënyrë të mençur ai din të thotë çështje të caktuara dhe unë e falënderoj.”

Me këtë rast, Vuçiç e përjashtoi si mundësi paraqitjen e Presidentit Trump në bisedimet që do të zhvillohen në Shtëpinë e Bardhë duke shtuar se një gjë e tillë mund të ndodhë kur të arrihet një marrëveshje. Dhe, e pranoi se tashmë pas zgjedhjeve dhe asaj që ka biseduar me Richard Grenell, do të bisedohet për çështje ekonomike.

Nesër Presidenti i Serbisë merr pjesë në paradën ushtarake me rastin e shënimit të 75 vjetorit të fitores ndaj fashizmit në luftën e dytë botërore në Moskë ndërsa të enjten do të udhëtoj drejtë Brukselit ku për dy ditë do të takojë krerët më të lartë të Bashkimit Evropian, dhe në fund para nisjes për në Washington sërish me Përfaqësuesin e BE për dialogun Kosovë-Serbi, Miroslav Lajçak.

Në fund, Aleksandar Vuçiç nuk harroi të jap edhe lajmin e shumëpritur për serbët se në muajin tetor, Presidenti i Rusisë, Vladimir Putin do të vizitoj Serbinë me rastin e hapjes së Katedrales ortodokse “Shën Sava” në Beograd.