Paralajmërim bizneseve, Rama: Masat Anticovid do ti zbatoni me forcë policore!

Pas raportimit për shtimin e infeksioneve me COVID-19, sot Kryeministri Edi Rama e pranoj më në fund se ka sinjale të arsyeshme se në vend kanë hyrë variantet e reja të Covid pa specifikuar raste konkrete dhe paralajmëroi se mund të kthehemi tek masat e forta kufizuese. Për të gjithë tregtarët e bizneset që nuk respektojnë masat Anticovid Edi Rama e bëri të qartë se do të detyrohen me forcë nga policia.

“Kemi sinjale te arsyeshme se në Shqipëri kanë hyrë variante të reja të COVID-19. Kkemi rritje të infektimeve edhe në grupmoshat e reja. Jemi shumë të motivuar të bëjmë çdo gjë si duhet që të mos detyrohemi të kthehemi tek masat e forta kufizuese. Për ketë duhet motivim i gjithsecilit. Ajo që po konsiderohet kudo si një tjetër valë infektimesh dhe që u vu re me numra që u rritën në mënyrë dramatike po reflektohet tani edhe këtu.

Masat që janë në fuqi janë masa që në këndvështrimin e ekspertëve të komitetit teknik funksionojnë, por që të funksionojnë siç duhet, duhen zbatuar. Është vënë re një shkelje rregullash kohët e fundit, është e papërgjegjshme që edhe politikanët i shkelin rregullat nëpër grumbullime,” tha Edi Rama duke e bërë të qartë se ditët në vijim do të rriten gjobat për tregtarët, që abuzojnë me masat kundër virusit të rrezikshëm.

“Nëse nuk marrim masa, situata do të rëndohet patjetër, në kushtet kur është e shmangshme. Jemi të gjithë të qartë që masat propozohen nga Komiteti Teknik i Ekspertëve, por nga ana tjetër ne që jemi këtu, së pari ne në anën e qeverisë, por edhe ju në media, kemi detyrimin të bëjmë më shumë se tjerët, që zbatimi i masave të jetë sa më korrekt. Sic iu kam informuar më parë, tani është e konfirmuar që Pfizer do të vijojë lëvrimin e sasive të tjera, duke nisur nga mesi i shkurtit. Vaksinat do të shtohen dhe numri i vaksinimeve do të rritet. Ama koha kur vaksinat dhe masa e numrit të të vaksinuarve të këpusë zinxhirin është ende larg. Edhe njëherë e nënvizoj për të gjithë, duke filluar nga tregtarët, të cilët të gjithë fleksibilitetin, mirëkuptimin, motivimin e autoriteteve shtetërore për të mos i ngarkuar psikologjikisht, por edhe për të mos i frenuar në rimëkëmbjen e vështirë pas goditjes që morën vitin e shkuar, nuk duhet në asnjë mënyrë ta marrin si një mundësi për të abuzuar,” tha Kryeministri.

“Pastaj dhe me radhë të gjithë të tjerët, por tregtarët kanë një përgjegjësi të posaçme, pasi janë në mjediset e tyre, ku është dhe ndërveprimi më i madh mes njerëzve, dhe ku është edhe rreziku më i madh. Nuk është rreziku më i madh në rrugë, në zyra, në shtëpi, por pikërisht aty, ku është dhe ndërveprimi më i madh. Nëse nuk duan të kthehemi te masat e forta kufizuese, duhet sot të mos kërkojnë të nxjerrin maksimumin, duke vënë në rrezik jetën e njerëzve dhe stabilitetin e sistemit tonë shëndetësor. Policia e Shtetit ka pasur një fleksibilitet maksimal, inspektoratet kanë pasur fleksibilitet maksimal. Ne nuk duam që policia dhe inspektoratet të hyjnë e të dalin nëpër lokale, bare e restorante, sepse sigurisht kjo nuk është më e mira për ecurinë e aktivitetit tregtar, apo nëpër qendrat tregtare, dyqane, etj, por nëse nga ana e tregtarëve nuk ka reagim të menjëhershëm, sigurisht që do të ndodhë kështu. Do të jetë Policia e Shtetit dhe inspektoratet që do ta imponojnë me forcë zbatimin e masave, si edhe me të gjitha gjobat përkatëse, të cilat do t’i rrisin. Së shpejti në ditët në vijim do të rrisim gjobat për lokalet, baret, restorantet, dyqanet. Dhe do të bëjmë një shkallëzim sipas hapësirave dhe sipas kushteve për abuzim.

Unë e kam shumë mik Ermal Mamaqin, por është e patolerueshme që të mblidhen një milet i tërë në atë formë sic ndodhi. Është e patolerueshme, është shembulli më i keq. Lokalet në Bllok, lokalet në zona të caktuara në Tiranë, lokalet më të mira, me më shumë fitime, me më pak dhimbje koke, të bëhen vatra ku kërcen Covid-i me muzikë, është e patolerueshme. Tregtarët, biznesmenët, kanë përgjegjësinë e madhe të jenë pjesë e frontit, duke zbatuar rregullat,” tha Rama me tone kërcënuese duke shtyar se qeveria që ai drejton nuk do ndahet e të fillojë luftën me njëri-tjetrin, kur të gjithë bashkë do ta luftojmë virusin.

Kërcënimin e fundit Edi Rama e kishte për bizneset e njësitë tregtare, por shtoi se pas Vitit të Ri edhe qytetarët e kanë lëshuar veten, ndaj i ftoi të mbajnë sërish maska, për të mos shkuar tek kufizimet e reja.

“Ne i jemi qasur kësaj lufte në këtë fazë me shumë fleksibilitet, kemi mbështetjen e komitetit të ekspertëve mendojnë që në këtë fazë këto masa janë të mjaftueshme duke besuar që njerëzit t’i zbatojnë Ata s’janë më si para disa javësh. Që nga Viti i Ri ka filluar një lëshim i vetes në tërësi, ka shumë abuzim. Që nga ata që nuk vënë maska shoh patriotet e mi në Surrel që i vënë si shaje të modës franceze. Nuk ka asnjë lloj sensi të përgjegjësive dhe rrezikut në njësitë tregtare. Shoh një lëshim të vetes, një lloj lehtësie të madhe, me të cilën po merret kjo punë. Në çdo centimetër që ne lëshojmë, virusi përparon.

Është një opsion patjetër që nga fundi i javës së shkuar jemi në diskutim për çfarë do bëjmë. E para, të zbatojmë mirë këto që kemi, policia të ndryshojë qasje, inspektoriati po ashtu, njësitë tregtare të ndryshojnë qasje, nuk dua të ndodhë, por inspektorë, taksidarë të futen nëpër lokale, biznese e njësi tregtare.

Do përgatitemi për zbatim rigoroz të masave dhe për të parë çfarë mund të bëjmë kufizime të tjera pa dashur të kthehemi tek kufizimet e forta të vitit të shkuar,” tha Kryeministri Edi Rama duke qartësuar të gjithë ata që çuditeshin nga erdhën këto rritje të infektimeve ndërsa përfundoi:

“Po i diskutojmë disa kufizime të tjera, për momentin nuk kemi. Është Komiteti që vlerëson numrat, trendet por jemi të bindur që duhet të reagojmë me forcë nëse nga ana e njësive tregtare nuk do ketë reagim.”