Paralajmërimi, BE: Pasoja, nëse nuk zbatohet marrëveshja mes Kosovës dhe Serbisë

Marrëveshje të nënshkruar mes Kosovës dhe Serbisë nuk ka, por edhe sot Bashkimi Evropian tha se palët e kanë për obligim që të zbatojnë të gjitha pikat e Marrëveshjes për normalizim të marrëdhënieve së bashku me Aneksin, në të kundërtën do të përballen me pasoja.

Sot zëdhënësi i BE, Peter Stano, u mundua të sqaroj situatën lidhur me zbatimin e kësaj Marrëveshje, pasi Presidenti i Serbisë Aleksandar Vuçiç, është shprehur qartë në telelvizionin publik serb, RTS, se do t’i zbatojë disa pjesë të Marrëveshjes dhe disa të tjera nuk do t’i pranojë, dhe ky “moszbatim”, sipas Vuçiçit, i është bërë i qartë edhe bashkëbiseduesve evropianë.

I pyetur nëse “Marrëveshja ka vdekur, pasi njëra palë thotë se nuk do t’i zbatojë disa pjesë të saj”, deri sa shef i diplomacisë evropiane, Josep Borrell, është shprehur se palët janë pajtuar për të gjitha pikat e Marrëveshjes dhe për të gjitha pikat e Aneksit, zëdhënësi i BE tha se gjithsesi Marrëveshja është e gjallë.

“Përderisa nuk komentojmë deklaratat e mundshme, pa e njohur kontekstin, dhe pa dashur të hymë në komente të secilës deklaratë rreth kësaj Marrëveshjeje, dua të fokusohem në Marrëveshjen si të tillë. Të dyja palët, Kosova dhe Serbia, u pajtuan në Ohër që të nisin menjëherë zbatimin e të gjitha pjesëve të Marrëveshjes, përfshirë edhe aneksin. Kjo është ajo për çfarë jemi pajtuar. Ky është obligimi politik që të dyja palët morën dhe ajo që shtetet anëtare dhe institucionet e BE-së presin nga ato,” tha Stano duke përsëritur edhe sot se ajo për çfarë janë pajtuar palët, duhet të zbatohet.

“Pikat e Marrëveshjes, si dhe aneksi, do të përfshihen në kapitullin 35 të kornizës negociuese në rastin e Serbisë. Kjo do të thotë se Serbia ka obligim kontraktual që të zbatojë pikat e Marrëveshjes, nëse dëshiron të arrijë progres në procesin e anëtarësimit. Pra, kemi një marrëveshje dhe një obligim që ajo të zbatohet, pa zgjedhur pjesë të saj,“ tha Stano duke folur për një mekanizëm përmes të cilit moszbatimi do të ketë pasoja edhe për reputacionin ndërkombëtar.

Me këtë rast Stano duke menduar se Serbia mund të preket edhe në sedër ndërsa theksoi se zbatimi është kyç për palët që të dëshmojnë se sa janë partnere të besueshme për BE-në dhe vendet anëtare.

“Monitorimi i zbatimit në terren, i veprimeve të palëve, do të jetë mjeti kryesor i Bashkimit Evropian, vendeve anëtare dhe bashkësisë ndërkombëtare, për të gjykuar përparimin, dhe a është apo jo marrëveshja gjallë. Dhe natyrisht do të ketë pasoja. Do të ketë pasoja politike, pasoja për reputacion por edhe pasoja financiare.“

Ndryshe, Kosova dhe Serbia nuk kanë firmosur Marrëveshje por është thënë se kanë ra dakord për Marrëveshjen për normalizim të marrëdhënieve më 27 shkurt në Bruksel, dhe për Aneksin më 18 mars në Ohër, dhe sipas BE edhe kështu janë ligjërisht obliguese.