Paralajmërimi, Berisha: Miratimi i buxhetit 2025 do të shoqërohet me protestë të fuqishme!

Duke vazhduar me denoncimet e buxhetit 2025 si buxheti i vjedhjes më të madhe në histori, sot Kryetari i Partisë Demokratike, Sali Berisha, tha se Edi Rama ka përjashtuar 40 përqind të popullatës shqiptare që jeton në fshat nga përfitimet buxhetore ndërsa Fondet shkojnë në sektorët ku vidhen më shumë.

Në ditën e miratimit të këtij buxheti, që lideri i opozitës e cilësoi si ditën e plaçkitjes më të madhe të vitit, paralajmëroi një protestë të fuqishme ku pritet të marrin pjesë qytetarë, pensionistë, fermerët, biznese të vogla dhe të papunë.

“Jemi në periudhën e diskutimit të buxhetit dhe për PD, shtyllë themelore e programit të saj do jetë ekonomia. Në këtë kuadër, ne kemi denoncuar këtë buxhet si buxhetin e vjedhjes më të madhe në histori.
Si buxhet që rritjen ekonomike e bazon në drogë, në kullat e korrupsionit dhe drogës, kurse të ardhurat i shndërron në parajsë për shqiptarët.
Sot unë jam për të denoncuar përjashtimin pothuajse të plotë, pothuaj në shkallë ekstreme të 40 përqind të popullatës shqiptare që jeton në fshat nga përfitimet buxhetore që janë kushtetuese dhe ligjore.
Përjashtimin e një sektori që kontribuon në prodhimin e brendshëm me rreth 20 përqind të tij.

Për bujqësinë, me të cilën mbahen pra 40 përqind e popullatës, e cila kontribuon në rreth 20 përqind të prodhimit të brendshëm, buxheti i këtij viti parashikon në mënyrën më absurde gjithsej 40 milionë euro.
Gjithsej më pak se një të dyqindtën e buxhetit prej 8.8 miliardë euro. Gjithsej më pak se një të gjashtëqindtën e prodhimit të brendshëm të vendit,” tha Sali Berisha duke folur dhe për falimentimin e fermave.
“Nuk ka një vend të dytë në botë të shumëzojë me zero në këtë mënyrë sektorin që kontribuon me 20 përqind të prodhimit të brendshëm dhe që mban 40 përqind të popullatës, ta përjashtojë në këtë mënyrë shkatërrimtare.
Në këtë mënyrë të qëllimshme, që të nxisë me të gjitha mënyrat rrënimin e prodhimit bujqësor, blegtoral, rritjen e çmimeve në treg të prodhimeve bujqësore dhe blegtorale, largimin masiv të familjeve nga fshati për në vende të tjera.
Falimentimin e fermave të tyre.
40 milionë euro të caktuara janë 4 gjer në 8 herë më pak se sa subvencionet që quhet në vendet e rajonit.
Kjo i bën tërësisht jokompetitivë në çmime, krahasuar me fermerët e rajonit, nuk po flas për të Greqisë që marrin subvencion edhe 20 herë më shumë se fermerët në Shqipëri,” tha Berisha duke konstatuar se Edi Rama po u jep goditjen e mëshirës fermerëve!

“Edhe në këto 40 milionë euro, sipas llogaritjeve, 55-60 përqind merren përsëri nga administrata dhe 40 përqind e tyre u mbeten pra rreth 18 milionë mbeten për fermerët. Nuk ka qëndrim më armiqësor ndaj tyre.
Të mos harrojmë se ky fermer blen inputet me çmimet më të shtrenjta. Se mbi këtë fermer rëndojnë taksat armiqësore, TVSH zero në blerje dhe 20 në shitje. Mbi këtë fermer rëndon mungesa e plotë e informacioneve për orientimet e tregut. Mungon këshilla e domosdoshme për ta. Kjo ka sjellë një rënie katastrofale të prodhimit blegtoral dhe bujqësor në Shqipëri.
Në një hark kohor 4-5 vjeçar, gjedhet kanë rënë mbi 50 përqind të numrit të kokëve. Po kështu të imëtat.
Në vend që buxheti të synonte shënimin e kthesës, përkundrazi i jep një goditje mëshire këtij sektori që jep 20 përqind të prodhimit të brendshëm të vendit,” vlerëson kryedemokrati dhe dhe kjo me qëllimin e vetëm që fermerët shqiptarë të largohen nga Shqipëria, të braktisin këtë tokë që është ndër më pjelloret.
“Paratë përqendrohen që të gjitha në sektorë ku vjedh më shumë qeveria. 15 përqind e buxhetit është në duart e Lubi Ballukut, asistentes më kryesore në vjedhje të Edi Ramës, e cila u kujtoj edhe njëherë të dashur qytetarë, mos harroni se në praktikën e Edi Ramës që ndante lejen e ndërtimit për çdo shkallë pallati, Lubi Balluku ndan unazën e Tiranës që ka mbetur në 14 kontrata në mënyrë që të mjelë, vjelë 14 gjoba.
Vjedhëse të tillë nuk ka parë, por gjithçka është në arkën e përbashkët Rama-Balluku, siç i kanë pasur në bashki gjërat.”

Në fund, Kryetari i Partisë Demokratike paralajmëroi se miratimi i këtij buxheti do të shoqërohet me protestë të fuqishme rreth parlamentit.

“Natyrisht ne kemi zgjedhur që të paraqesim amendamentet tona në komisione dhe seancë plenare, të sigurt se ato nuk pranohen nga qeveria, e cila ka një synim kryesor, plaçkitjen maksimale të këtij buxheti nga organizata kriminale që kryeson Edi Rama, por paraqitja e tyre është një detyrim solemn para shqiptarëve për të bërë avokatinë e tyre dhe për të qenë të obliguar që në mbledhjen e parë të parlamentit shumicë të PD, ato ligje të votohen dhe të hyjnë në fuqi menjëherë,” tha Kryetari i Partisë Demokratike, Sali Berisha, duke përfunduar:
“Sigurisht, miratimi i këtij buxheti do të shoqërohet me protestë të fuqishme rreth parlamentit, ku qytetarët, pensionistët, fermerët, të papunët, bizneset e vogla, të gjithë ata që dëshirojnë të thonë zërin e tyre në ditën e plaçkitjes më të madhe të vitit, plaçkitjes së buxhetit në parlamentin e krimit.”