Paralajmërimi i bllokimit të rrugëve në Serbi, Policia e Kosovës me plan operativ

Pas paralajmërimeve nga “Këshilli Organizativ për Bllokada”, për bllokim rrugësh që çojnë në pikëkalimet kufitare Merdarë, Jarinje dhe Bërnjak, Policia e Kosovës ka hartuar një plan operativ.

Kryetari i shoqatës së pagëzuar “Shoqata e qytetarëve të Qarkut të Mitrovicës për Kosovë”, Rasha Rojeviç, ka bërë të ditur se sot do të fillojë bllokimi shumëditor i pikave kufitare drejt Kosovës.

Mediat serbe raportojnë se Rojeviç është shprehur se bllokimi do të organizohet nga shoqatat vendase të qytetarëve nga Kosova dhe se katër nga pesë vendkalimet kufitare nga drejtimi i Serbisë qendrore dhe Malit të Zi do të bllokohen.

“Bllokimi do të fillojë në orën 18:00 dhe do të zgjasë derisa të tërhiqen forcat policore të Kosovës nga veriu i Kosovës. Gjithashtu kërkojmë që KFOR-i të merr kontrollin e veriut të Kosovës,” tha Rojeviç.

Sipas tij, bllokimi do të zgjas derisa të plotësohen kërkesat e qytetarëve.

Nga Policia e Kosovës, thanë se, si çdo herë, edhe tani kanë plan veprimi.

Zëvendësdrejtori i Policës për rajonin e veriut, Veton Elshani, tha se Policia ka planet operacionale dhe nuk e zë diçka në befasi.

“Gjithmonë kur kemi informacione se diçka mund të ndodhë ne kemi planet operacionale nuk na zë diçka në befasi në rast se kemi bllokim të pikave kufitare,” tha Elshani.

Lidhur me këtë paralajmërim ka reaguar KFOR-i.

Sipas tyre, është e rëndësishme të shmangen veprime që mund të krijojnë tensione të panevojshme.

“Ky është çelësi për sigurinë e qëndrueshme në Kosovë dhe për stabilitetin rajonal”, thuhet në përgjigjen e KFOR-it.