Paralajmërimi, kreu i SPAK: Kemi hetime për korrupsion dhe pastrim parash, tani është momenti…

Kemi shumë hetime të rëndësishme në vijim për pastrimin e parave, korrupsionin dhe tani është momenti të ecim përpara, tha kreu i SPAK, Arben Kraja, me rastin e prezantimit të Programit EU4LEA nga Ambasadorja e Bashkimit Evropian në Tiranë, Christiane Hohmann

“SPAK është tani e konsoliduar si strukturë dhe është në një fazë delikate që të kapërcejë problemet e fillimit dhe të japë produktin e nevojshëm. Situata është që të gjithë janë tepër intensivë dhe aktivë në ushtrimin e detyrës. Kemi shumë hetime të rëndësishme në vijim për pastrimin e parave, korrupsionin dhe tani është momenti të ecim përpara. Niveli që kemi arritur në bashkëpunim është rritur në mënyrë të vazhdueshme. Kemi 20 skuadra të përbashkëta hetimore që kryejnë hetime me vendet e BE-së,” tha Arben Kraja duke vlerësuar se vendi ynë ndodhet në një fazë shumë të rëndësishme që ka të bëjë me integrimin në Bashkimin Evropian ndërsa përfundoi:

“Edhe institucionet e zbatimit të ligjit kanë një rol shumë të rëndësishëm se jemi në një stad pak më të lartë. Do kërkohet edhe produkt, jo thjeshtë të kemi institucione. Duke përfshirë edhe situatën e kriminalitetit që ndodhet në Shqipëri që kërkon një reagim të fuqishëm të zbatimit të ligjit”.

Ndryshe, Ambasadorja e Bashkimit Evropian në Tiranë, Christiane Hohmann, duke prezantuar Programin EU4LEA tha se për institucionet evropiane, çështjet kritike që do të shikohen janë konsolidimi i reformës në drejtësi, formimi i institucioneve të pavarura të drejtësisë, historiku i hetimeve, ndjekjeve penale dhe i dënimeve në luftën kundër korrupsionit dhe krimit të organizuar ndërsa priten më shumë rezultate në fushën kundër pastrimit të parave.