Paralajmëron tërmet dhe takon Presidentin, Rama diskuton me usta Damianin se sa ballë do jetë!

Sapo mbaroi diskutimin prej 16 orë e 25 minutash me kabinetin e tij qeveritar, mbrëmë Kryeministri Edi Rama paralajmëroi tërmet për vitin 2023 ndërsa sot iu drejtua Presidentit Bajram Begaj për tu takuar më pas me ministrat dhe drejtuesit e institucioneve në varësi të qeverisë.

“Takimi i fillimvitit me kryetarin e shtetit për ta informuar mbi çështjet kryesore të këtij viti qeverisës, si edhe për të përgatitur mbledhjen e Këshillit të Sigurisë Kombëtare dhe ndryshimet e ambasadorëve në misionet tona diplomatike,” thekson Edi Rama pas takimit me Presidentin e Republikës përmes rrjetit social Facebook por kjo buzëqeshje nuk iu shfaq kur vazhdoi me takimet me ministrat e tij e dhe krerët e institucioneve me të cilët po mendon të bëjë tërmet!

Bazuar në komunikimin pas këtij takimi, Kryeministri nuk është i gatshëm për kompromis me Damian Gjiknurin, jo si Sekretar i Përgjithshëm i partisë por si usta i tërmeteve për zgjedhjet, dhunti që e konfirmoi në zgjedhjet e Dibrës ndërsa krekosej në përgjimet e gazetës gjermane “Bild”; A e ka pranuar sfidën Damian Gjiknuri nuk dihet por nga habia që shfaq mund të kuptohet që i është kërkuar një tërmet i fuqishëm prej shumë më shumë ballësh se sa mund të vjedhë zotnia e tij vota!

Gjithsesi, pas mbledhjes maraton prej 16 orë e 25 minutash, mbrëmë Edi Rama i ekzaltuar nga copa leckash të mbuluara që proklamonin një qeverisje hata për këtë vit, vetë Kryeministri ndërsa e shoqëron me një video shkruan në rrjetin social Facebook:

“Maratona e diskutimit të fillimvitit në qeveri sapo mbaroi pas 16 orë e 25 minutash, ku kaluam në skaner çdo sektor për vitin që sapo iku dhe debatuam e miratuam objektivat konkretë të këtij Viti të Ri, i cili do të jetë një vit më pranë njerëzve, duke u nisur gjithnjë nga ata më në nevojë.”