Paramilitarët kosovarë dhe militarët rilindas!

nga Agim Popoci

75 vjetori i UDB-së në Tiranë po shënohet në mënyrë ceremoniale si nga Presidenti i Republikës, Ilir Meta ashtu dhe Kryeministri Edi Rama me një spektakël të paparë sigurie, ku protagonistë kryesor të rezultatit të strukturave të sigurisë shqiptare që luftojnë cenimin e rendit kushtetues janë, kosovarët!

Janë ngritur shumë hipoteza deri të mërkurën e 18 Shtatorit se kush do të mund ti vinte flakën Parlamentit të Shqipërisë më 8 Qershor, për çfarë kishte dëshmuar Presidenti i Republikës në Komisionin Hetimor për shkarkimin e Presidentit, por duke pasur parasysh miqësinë e Ilir Metës me Ramush Haradinajn, si dhe krenarinë e Kryeministrit Edi Rama me ministrin e Jashtëm dhe atë të Arsimit, askush nuk e ka menduar se komunistët shqiptarë sërish do të akuzojnë kosovarët, siç bënë më 1944, 1945, 1981, 1998, 2002 dhe së fundi 2009, po nga kjo parti kriminale, nga vijnë Meta dhe Rama.

Por ja që ndodhi dhe kosovarët zunë vend edhe në konfliktin e sajuar Meta-Rama, ku Ilir Meta na paska anuluar zgjedhjet e 30 Qershorit sepse një grup paramilitar nga Kosova si pjesëmarrës në zgjedhjet e opozitës më 8 Qershor, sipas Shërbimit Informativ Shtetëror, mision final kishin djegien e Parlamentit të Shqipërisë.

Realisht kjo përmbajtje e një dokumenti të sigluar Top Sekret është tronditëse të dëgjohet sot, por akuzat që i bëhen kosovarëve nga komunistët shqiptarë nuk janë të padëgjuara; Dhe, përveç se vijnë nga Beogradi, ato zënë vend sepse krimet komuniste vazhdojnë të jenë të pazbardhura ndërkohë që shqiptarët lexojnë një histori kriminale në shkolla që as armiqtë më të mëdhenj të shqiptarëve nuk do ta kishin hartuar më mirë.

Sot shqiptarët mësojnë në shkolla se Mbreti Zog fali Shën Naumin edhe pse nuk është e vërtetë, dhe po në këto shkolla atyre nuk u thuhet se Enver Hoxha fali Kosovën pas luftës së dytë botërore. Shqiptarët edhe sot nuk e dinë të vërtetën e Konferencës së Bujanit me të cilën shqiptarët e Kosovës u futën në luftë kundër fashizmit, pasi iu garantua se do ta kenë të drejtën e vetëvendosjes me përfundimin e luftës; Por ishte Enver Hoxha ai që i bëri vendimet e kësaj Konference nul dhe iu servir  një masakër e paqenë e kosovarëve e 4 Shkurtit, ndonëse deri më sot toka shqiptare nuk ka lindë ende shqiptarë më të përkushtuar për krijimin e një shteti të fortë shqiptar si Xhafer Deva!

Ishte viti 1945 kur UDB u ul këmbëkryq në Qeverinë e Shqipërisë ku kishte dhe përfaqësuesin e saj dhe asgjë që ndodhi me kosovarët dhe jo vetëm nuk ishte rastësi, dhe vazhdon të mbetet e pazbardhur. Ftohja e sajuar e Enver Hoxhës me Titon më 1981 do të dëshmoj se është shumë larg të vërtetës. Demonstratat e vitit 1981 ishin shqetësim për Enver Hoxhën i cili alarmoi strukturat e sigurisë por raporti i masave që kishte bërë Kadri Hazbiu në rast të përshkallëzimit të situatës, dëshmoi se UDB-ja nuk kishte lëvizur nga toka shqiptare.

“A je i çmendur, do të prishemi Ne me jugosllavët për kosovarët,” ishte reagimi i Enver Hoxhës pasi lexoi raportin e masave të Kadri Hazbiut, ku ndër të tjera parashikohej edhe ndërhyrja ushtarake nëse “cenohet jeta e vëllezërve kosovarë”. Hazbiu që kishte ngatërruar fjalimet e Enverit me realitetin, dihet se ku përfundoj ashtu si dhe kosovarët që vazhduan në mënyrë ilegale të kalojnë në tokën e  premtuar, shtetin amë!

Shteti ra më 1997 por deri më sot nuk u tha e vërteta sepse agresor ishte PPSH, përkatësisht PSSH, në realitet Sigurimi i Shtetit i cili po luftonte me devotshmëri dhe me urdhër nga Beogradi, tranzicionin shqiptar. U panë shumë makabritete si djegia e bibliotekave dhe pirja e gjakut të punëtorëve të strukturave të sigurisë që nuk ishin nën urdhërat e UDB-së, por me arsyetimin e humbjes së parave në firmat piramidale, nuk u sqarua as ngritja e tre gishtave serbë në gjithë jugun e Shqipërisë, që la mbrapa, vrasje, djegie dhe shkatërrim të institucioneve shqiptare. Vetëm një vit pas këtij makabriteti, masa e revoltuar shqiptare për vrasjen e Simbolit të Demokracisë, Azem Hajdari, sërish dëshmoi me 14 shtatorin e famshëm se nuk ka shtet, por meqë komunistët ishin në pushtet, ata gjetën fajtorin, kosovarët! Pra, vetëm pas një viti, populli që pinte gjak njeriu dhe digjte edhe biblioteka përveç se çdo gjë shtetërore, kishte problem në gjetjen e njerëzve që djegin kryeministrinë dhe futen në Televizionin Shqiptar, por u duhet të importojnë ca kosovarë për një grushtet shteti edhe pse shtet nuk kishte.

Dhe meqë nuk u zbardhë e vërteta dhe kosovarët ngelën vetëm në raportet e Shërbimit Informativ Kombëtar vjen viti 2002, ku dëshmohet se nuk është ndonjë problem që me një arkivol të futesh në Kryeministri. Komunistët shqiptarë krijuan idenë se ishte harruar 14 shtatori dhe inskenuan një të dytë për të treguar se sa të keq janë rivalët e tyre politik. Fatkeqësisht pjesë e këtij inskenimi nga kriminelët komunistë ishte trupi i pajetë i shqiptares më të madhe që ka njohur deri më sot kombi shqiptarë, Mbretëreshës Geraldinë. Ashtu siç e trajton historia Mbretin, në mënyrë po aq kriminale u trajtua edhe Nëna Mbretëreshë që dha një kontribut të paparë në ndërkombëtarizimin e shtetit shqiptar. Por komunistët nuk kanë të ndalur!

Ardhja e Edi Ramës në krye të PSSH nuk ndryshoi asgjë si në raport me Sigurimin e Shtetit, Beogradit ashtu dhe kosovarëve. Zgjedhjet e vitit 2009 dëshmuan se ku mund të shkoj imagjinata e tyre kriminale. Në prag të zgjedhjeve, ata sërish akuzuan kosovarët se në ditën e zgjedhjeve do të vinin 10.000 kosovarë për votuar në Kukës, shifër kjo përveç se për propagandë po përgatiste elektoratin komunistë për humbjen ndaj rivalit PD, të cilën e kishin konfirmuar pa filluar gara. Në një debat televiziv në njërin ndër ekranet më të njohura shqiptare, e hodha poshtë  këtë idiotizëm me vetëm një fjali “është e pamundur”, por ku në panel ku të gjithë i ke kundër, duke përfshirë edhe drejtuesin e emisionit, pa përgjigje ngeli vetëm një, pyetja ime: “10.000 kosovarë janë 200 autobusë, ku do të parkohen në Kukës 200 autobus!” Ngela pa përgjigje ashtu si dhe shqiptarët që po e ndiqnin këtë emision ndërsa në studio nuk pushoi ilariteti edhe pas reklamave që u stërgjatën!

Por, ky Sigurim primitiv i Shtetit që nuk po pushonte në luftën e tij për pushtet, guxoi të godas sërish shtetin më 2011 duke e ditur se vërteta nuk do të zbardhet, dhe kështu ndodhi. Meqë PSSH nuk ishte në pushtet, kosovarët nuk u akuzuan por shqiptarët kanë dëgjuar gjithçka deri më sot, vetëm të vërtetën jo, ndërsa 4 viktimat e kësaj kryengritje komuniste edhe sot tallen nga partia në pushtet.

Sot konflikti ndër komunistë për pushtet Rama-Meta është ngatërruar paksa dhe në pamundësinë për tu dëshmuar se cili është më kriminel, fajtorin e konfliktit të tyre sërish e gjejnë ndër kosovarë por jo nga e vërteta e hetimit të Komisionit Hetimor për shkarkimin e Presidentit.

Sot është e vështirë të gjesh një zviceran, jo të natyralizuar, që i vë flakën Parlamentit të Zvicrës. Por pas gjashtë vjetë qeverisjeje Rama-Meta, kur gjithçka është vjedhur në këtë vend nga pushtetarët dhe populli është në varfëri ekstreme, ndër këtë popull me këtë të kaluar djegieje dhe makabritetesh, më e vështirë  është të gjesh një qytetar që nuk është i gatshëm ti vëjë flakën Parlamentit, se sa një qytetarë si  “kosovari të cilin e gjen SHISH” që mision final ka djegien e Parlamentit të Shqipërisë.

Në fund, shqiptarëve u janë mohuar shumë të vërteta por si nuk bëhet ky vend e kanë të qartë: Derisa militarët rilindas që shpikin paramiltarë kosovarë e qeverisin këtë, pak rëndësi ka nëse e ka thënë Ilir Meta apo Edi Rama, Sigurimi i Shtetit vazhdon të jetë në pushtet!